Na Corsou, ex minister a raporta na prizon pa sinta su castigo di 20 luna

WILLEMSTAD - Jacinta Constancia èks minister di salubridat pa partido MFK ayera a presentá na prisòn SDKK, pa bai sinta su kastigu di 20 luna ku el a haña den e kaso Dubnium/Mondkapejs. El a presentá, pa sinta su kastigu despues di a haña karta di Ministerio Públiko ku ta indik’é ku ayera mainta e mester presentá na prisòn pa bai sinta su kondena. El a bisa di ta bai pa bini bèk, i e ta keda un sòldá di trabou.

Den su promé palabranan e èks mandatario a duna di konosé ku e no a tuma despedida di su hendenan di bario di Boca Sami ayera, pasobra e ta bon konsiente ku esaki lo a lanta hopi emoshon serka dje i su hendenan di Boca Sami.

E ta bai pa bini bèk, e ta keda un sòldá di trabou, i e ta sirbidó di pueblo. E ta un muhé di trabou i no ta ladron. For di un dia promé el a tuma despedida di su mama, ruman i otro hendenan serka di dje pa ayera e ta mas trankil.

Mas aleu Jacinta a bisa ku hende sa bisa ku prisòn, santana i hospital ta pa tur hende, pero den e kaso aki prisòn no ta pa su persona, pasobra e no a hasi nada. “Mi ta aki nan pasobra mi no por a mustra mi inosensia pa 9 aña largu”. Den kaso di malversashon na BZV, wes a bisa esnan kulpabel ku mester paga 4.2 mion bèk, pero esnan ku a hiba mal maneho ta sigui kana rònt, esta Yarzagaray, Abdalah i Römer i otronan. Na a hiba mal maneho na BZV, pero nan ta kana rònt, miéntras ta tur tipo di investigashon a hasi rondó di Jacinta, tantu na Kòrsou komo na Ulanda i otro partinan di mundu. Ta tur tipo di investigashon a hasi riba su persona i a keda demostrá ku e no a haña niun depchi di e sèn ku a saka for di BZV. Pero a bai tira e kos leu ku e lo mester tabata sa ku su èks kasá a haña sèn i a duna ‘baisait’. El a bisa ku ta hopi loko e mester tabata pa partisipá den esei. Sra. Jacinta a bisa ku fondo a kaba, i ta hopi fundraising e mester a hasi pa por haña fondo pa su kaso.

Jacinta a sigui bisa ku e ta hende ku ta traha i yuda hopi hende. Den e kuadro ei e hendenan ku tabata haña pakete di kuminda ta sigui normal, meskos ku esnan ku ta haña yudansa i guia pa buska trabou. Tur e proyektonan aki ta sigui normal pasobra no por perhudiká e hendenan ei.

Un kos ta bèrdat, hende mester wak 5 punto. Un hende mester wak dilanti pa sa unda ta bai, mester wak den banda pa sa ken tei, wak bo tras pa bo sa di unda ba bin, wak den laira pa kòrda ku tin un Dios den shelu i wak abou pa wak ken ta trapa, sra. Constancia a bisa pa despues drenta prisòn pa kumpli ku su kastigu. Su eks kasa, Anberto Scoop tambe mester a presentá na prisòn pa sinta su kastigu. NOTA: E texto ta scirbi den Papiamento fonetico di Corsou.