Gobierno a inicia un ‘campaña’ contra ley di Reino pa supervision financiero

ORANJESTAD – Mientras cu e fecha riba cual Aruba mester paga e debe di Covid ta yegando cerca, (10 di October 2023:red) Gobierno di Aruba diaranson a manda ,- loke a mustra como señalnan aun mas fuerte cu un dia prome -, cu nan a inicia nan campaña publico contra e ley di Reino pa supervision financiero cu yama RAFt. Un di e condicionan di Hulanda pa por refinancia e debe di mas di 900 miyon florin na October contra un interes hopi abou (3%:red)  ta cu Aruba mestert firma e ley di Reino di RAFt pa October prixomo. E accion di ayera por lo menos por wordo mira como e señal manda via rednan social diaranson. 

MENSAHE DI PROME MINISTER RIBA RAFT

Un dia prome, e prome mandatario den un comunicado a bisa cu si Hulanda kier pa Aruba acepa e ley di Reino riba supervision financiero, cu Aruba mester haya un tipo di dispensacion, osea kwijtschelding. E mensahe principal di e mandatario, tabata cu Aruba ta negoshando ainda cu Hulanda riba e terminonan aki y cu tin algun posibilidad. Pues cu no a tuma ningun decision ainda pero cu ta na mesa ainda. Sinembargo den e mesun articulo, e mandatario ta sugeri como posibel condicion pa Hulanda, cu si e kier RAFt, Aruba mester haya algo bek cu ta den e caso aki un tipo di dispensacion. 

CAMPAÑA RIBA FACEBOOK

Un dia despues, esta diaranson, varios ministernan,- conforme emodus operandi di e gobierno aki -, a manda un mensahe ‘uni’, esta e mesun mensahe riba nan pagina sea personal of oficial di minister riba Facebook, pa mustra cu nan ta uni cu e respectivo causa. Por a mira como tal cu ayera diripiente tur of mayoria di e ministernan a pone riba nan pagina “Nos ta negocia, nan kier entrega!” cu e hashtag #ArubaDushiTera. E parti di ‘nan kier entrega’, ta dirigi primordialmente na e partidonan opositorio cu segun e coalicion, si ta pro pa e RAFt manera cu e ta, y como tal coalicion ta considera esaki como un paso entreguista.

OPOSICION SU PENSAMENTO RIBA RAFT

Noticiacla a compronde di por lo menos un partido opuesto, cu nan ta pro RAFt si, pero si cu nan tin cierto adaptacionan cu nan kier mira. Pues nan no ta pro e RAFt den forma integral manera cu gobierno Hulandes kier mira esaki. 

PARLAMENTO 

Fuera di ministernan, presidente di parlamento di Aruba Edgard Vrolijk tambe a vocifera su opinion diahuebs den e corant local Solo Di Pueblo, bisando e.o. cu ‘Aceptando RAFT manera Hulanda kier, lo mata e pais manera a pasa na Corsou y St Maarten. Cu esaki, e ta referi na e hecho cu ambos pais a haya dispensacion, kwijtschelding, pero cu aworaki e debe di e respectivo paisnan ta mas halto cu ora cu nan a haya e dispensacion, pues cu otro palabra, e dispensacion pa nan no a funciona.