Awor si e centro di prostitucion na Corsou, Campo Alegre ta bay na findishi

WILLEMSTAD - Tin indikashon ku awor si tur kos ta kla pa Campo Alegre pasa pa findishi. Ta for di aña pasa e findishi mester a tuma lugá, pero a keda posponé entre otro pa kaso den korte.

Dia 6 di sèptèmber 2022 e findishi di Campo Alegre lo mester a kontinuá. Esaki despues ku Ministerio Públiko a anunsiá ku a para e findishi di benta di e sentro di prostitushon ku mester a tuma lugá dia 21 di yüni 2022. No a duna e motibunan dikon a posponé e findishi te despues di reseso.

Te kaminda nos tin informashon, tabata pidi p’e sentro di prostitushon un suma di 8.9 mion florin. Pa mira si e hende por kumpli ku e proseso pa kompra di Campo Alegre, mester presentá ku un garantia di banko di 5 mion florin. Pero e findishi ei tambe a keda posponé.

Kaso den korte

Dia 9 di yanüari 2013 den un sentensia ku a bira irevokabel, Korte di Apelashon a dikta ku e kompania Wilshire Advisors Ltd (Wilshire) tin un debe na gobièrnu di Kòrsou dor di un kaso di ekspropiá. E debe ta alrededor di 14 mion florin. Segun e sentensia den e kaso aki, Wilshire pa medio di plaka di transporte di droga, i tambe un konstrukshon di labamentu di plaka a kumpra e kompleho di Campo Alegre.

Wilshire no a kumpli ku su obligashonnan di pago di e sèn aki na gobièrnu di Kòrsou, i for di 2014 tabatin vários intento di parti di gobièrnu, esta hustisia pa por a bende Campo Alegre na findishi, pa di tal manera e sènnan ku generá dor di e findishi aki por kubri loke ku Wilshire debe gobièrnu ku e kaso penal aki.

Durante di e último findishi ku tabata plania aña pasá a konstatá ku tin un beslag riba Campo Alegre, dor di sr. B. Verhage, e èks akshonista di Wilshire. Esei ta nifiká ku si bai findishi tur e sèn generá lo no bai pa gobièrnu. For di investigashon ku gobièrnu di Kòrsou i Ministerio Públiko a hasi, a resultá ku e beslag ku Verhage a pone ta ilegal.

Gobièrnu i fiskal a disidí pa start un huisio sumario kontra di Verhage pa lanta e beslag. Tratamentu di e kaso mester a tuma lugá 13 di aprel, pero no a tuma lugá mas. Promé ku tratamentu di e huisio sumario por a tuma lugá, Verhage a pidi dùrwarder pa lanta e beslag riba Campo Alegre. E beslag a keda lanta. Dor di esaki, awor Ministerio Públiko sin ningun problema por sigui ku e medidanan di ekspropiá. Pues awor ku no tin beslag, si Campo Alegre ta kla pa bai findishi.

Findishi

I awor e momentu di e findishi ta yegando. EXTRA por informá ku e benta ta tuma lugá riba enkargo di Ministerio Públiko. E kompleho ta propiedat di e kompania establesé na British Virgin Islands yama Wilshire Advisors Ltd. E benta ta plania pa tuma lugá djamars 26 di sèptèmber 2023 na Renaissance Wind Creek hotel pa 10or di mainta. NOTA: E texto ta scirbi den Papiamento fonetico di Corsou.