AHATA y AFBA: Saca ‘handelsgoederen’ for di ley di BBO na frontera!

ORANJESTAD – E gremionan AHATA y AFBA (Aruba Food & Beverage Association) a urgi Parlamento y gobierno diamars pa considera eliminacion di e termino ‘handelsgoederen’ for di e ley di cobransa di BBO na frontera y tambe elimina e exclusion di hotel y restaurant di e memory van toelichting. Tur esaki pa evita aumento grandi di prijs na Aruba a consecuencia di e ley den e formato ey. 

REUNION PARLAMENTARIO

E carta ta yega 1 dia prome cu Parlamento trata e ley mes, esta diaranson mainta. Un ley cu mester a pasa dos luna pasa pero pa motibo cu falta un miembro di parlamento pa coalicion, no por a garantisa cu nan tin sufiiciente voto riba nan mes (11) pa pasa e ley. 

E CARTA

E carta ta splica e situacion unda cu e gremionan ta compronde cu e ley ta keda trata diaranson, y pesey nan kier a haci un ultimo intento pa logra e cambionan menciona, prome cu esaki pasa den man di e parlamentarionan y cu nan vota y aproba e ley finalmente. E intencion ta pa despues di tratamento, aproba e ley pa e por bay den vigor 1 di augustus proximo. 

VERSION ACTUAL NO TA BON

Segun e dos gremionan, forma con e ley ta aworaki, no ta cumbini e dos gremionan en particular, y ta nifica cu unabez cu e ley pasa asina, e lo nifica aumento di gasto pa nan, y consecuentemente haci negoshi na Aruba mas caro. Nan ta mustra cu Aruba ta caro caba y awor ta bay hacie aun mas caro, tanto pa local como pa turista. E carta ta sigui splica e problemanan cu e companianan ta haya nan mesa den si no cumpli cu e sugerencia haci pa nan (comienso di e carta), ilustrando cu ehempelnan con e panorama lo bira unabez cu e ley pasa asina. 

GOBIERNO SU MOTIBO

Segun e dos gremionan, e motibo cu gobierno a duna pa cual mester pasa e ley den su concepto actual, ta cu mester genera mas placa den caha di gobierno. Riba esaki, e gremionan en cuestion ta disputa esaki argumentando cu gobierno ta hayando placa otro caminda door di emiti bono contra un interes hopi halto. Y ta argumenta cu gobierno no ta transparente riba e surplus cu gobierno a crea desde cu a aumenta BBO cu 1%. Segun e dos gremionan, cu e sugerencianan cu nan ta menciona den nan carta, gobierno por logra nan meta tambe, esta mas placa, sin cu nan ta crea mas gasto innecesario pa comercio. Pa e carta completo, click AKI.