Dama a cay for di barco crucero na caminda pa Corsou y sobrevivi

ORLANDO/ WILLEMSTAD  – Un pasahero riba e barco crucero Mariner of the Seas di e cadena Royal Caribbean Cruise Lines cu tabata na caminda pa Corsou, a cay for di e railing di e di 10 piso y sobrevivi. Esaki a sosode diadomingo ora cu e dama di 42 aña di edad tabata sinta riba e railing sacando potret. E la slip y cay den laman, y despues di un operacion di rescate di 45 minuut, e dama milagrosamente a keda rescata pa personal di e barco mes. Data di un raport di Cruise Lines International Association ta mustra cu riba incidentenan operacional manera esaki, entre 2009 y 2019, solamente 28% di persona cu cay den laman, ta wordo rescata exitosamente.  

CORSOU

E dama a wordo hospitalisa den e enfermeria di e barco pa observacion, y ora cu e barco a yega Corsou, a traslade pa hospital pa mas observacion. E barco mientrastanto (e foto adhunto ta di APA di e bishita di e barco ayera na Aruba) a bishita Aruba diamars segun schedule normal. No ta conoci si e dama a sigui abordo of si e la keda atras na Corsou.