Caso sumario di Aruba Bird Life Conservation contra Embassy Suites lo sigui sin sosten di gobierno

ORANJESTAD – E caso sumario cu Aruba Bird Life Conservation ta entamando contra Natura Development, desaroyadornan y doño di Embassy Suites hotel, no ta conta mas cu e sosten di gobierno (lesa: Directie Natuur & Milieu). Mientras cu partidonan envolvi no ta confirma esaki specificamente, fuentenan cerca di e caso sinembargo a clarifica esaki na Noticiacla dialuna mainta. E informacion ta cu ‘por sali di e punto di bista’ cu ABC so lo entama e caso awor, despues di loke a sosode den fin di siman, ora cu e participacion inicial di gobierno, a causa un problema serio den seno di e coalicion. A compronde tambe cu e caso ainda no ta entrega y ta trahando riba esaki pa esey sosode e siman aki ainda. E plan original tabata pa gobierno ‘join’ cu e caso aki, pero esey ta cambia aworaki. 

E PLAN ORIGINAL

E plan original (cu minister Ursell Arends) mes a confirma diabierna pa noticiacla, tabata cu hunto lo a entama un caso contra doñonan di e hotel, pa para e proyecto di mehora y drecha e beach dilanti di e hotel. E momento ey, e intencion tabata pa ministerio di naturalesa y medio ambiente uni cu ABC pa e caso tuma lugar. Pero ora cu e partner di coalicion (lesa: premier Evelyn Wever Croes) a tuma nota di esaki, e la crea un ola di reaccion basta fuerte, cu a culmina cu e prome mandatario publicamente cuestionando e accion di colega minister y unda cu publicamente a pidi e mandatario un splicacion di ‘kico por a bay robez’. E splicacion ey a bin 3 ora despues den un comunicado di e minister encuestion, sigurando cu e tabata un ‘ekibocacion’ y cu no tin problema den gabinete y cu a coregi e problema caba. Aparentemente e ‘formulacion’ di e caso tabata poni di tal forma cu ‘eroneamente’ lo a ‘crea e impresion’ cu gobierno lo ta bringando otro. Mientrastanto ambos Partido (ABC y gobierno) no a reacciona riba e peticion di e portal aki pa un reaccion official, aunke inoficial a compronde di ABC cu gobierno no ta forma parti mas di e caso.