Arends: Caso entama a crea impresion ekiboca cu e lo tabata un caso contra gobierno mes

ORANJESTAD - E peticion pa e ordemaatregel ta contene un ekibocacion cu a crea e impresion cu un minister ta demanda un ministerio di un otro minister. E ekibocacion aki no tin mas consecuencia pa e proceso. Asina minister responsabel pa Naturalesa Ursell Arends a bisa diadomingo atardi, reaccionando riba un declaracion anterior di colega prome minister Evelyn Wever Croes, cu a cuestiona e accion di e colega Arends. E prome mandatario no a aprecia e accion tuma cu ta mustra como un caso di un minister contra otro minister. Algo cu segun minister Arends, no ta asina.

KICO A PASA SEGUN MINISTER

Segun e splicacion di minister Arends, tabata cu durante transcurso di e ultimo simannan, algun desaroyo a tuma luga relaciona cu un aanlegvergunning pa crea un beach dilanti Embassy Suites. Dia 16 di juni 2023, Natura Development N.V. a haya un aanlegvergunning pa crea un beach, bou di varios condicion. Un di e condicionnan ta cu no por kita of haci daño na naturalesa sin ontheffing di Minister di Naturalesa. Esaki tambe ta un prohibicion regla den nos Natuurbeschermingsverordening.

ACCION DI NATURA DEVELOPMENT TA REKERI ONTHEFFING

“Lastimamente, a cuminsa kita un tipo di mata protegi na e sitio en cuestion. Esaki sin un ontheffing di mi ministerio manera exigi pa ley y poni como condicion den e aanlegvergunning”, Minister Arends ta declara. Natura Development N.V. ta di opinion cu nan no mester di un ontheffing y cuminsa cu e trabaonan. Motibo pa cual Gobierno mester a actua lihe pa preveni mas daño na naturalesa. Pa para e actividadnan, a opta pa un ordemaatregel. Y ta aki ta unda cu tabatin fayo, segun Arends. “A resulta cu fundacion ABC tawata preparando un paso similar. Den comunicacion rapido cu e abogado di ABC, un peticion pa un ordemaatregel a sali cu a logra su meta di proteha naturalesa e.o. mustrando cu Minister di Naturalesa no a duna un ontheffing” Arends a sigui bisa. 

PARA ACTIVIDAD Y EKIVOCACION

Den esaki obhetivo di Minister di Naturalesa ta pa atende e desaroyador cu e mester para e actividadnan y sigui e proceso indica. E peticion pa e ordemaatregel ta contene un ekibocacion cu a crea e impresion cu un minister ta demanda un ministerio di un otro minister. E ekibocacion aki no tin mas consecuencia pa e proceso. Mas importante ta cumplimento cu ley y condicion, y proteccion di Aruba su naturalesa. “Esaki hustamente tawata ta e meta di e Minister di Naturalesa, cu a actua rapidamente pa preveni mas daño na naturalesa. Gobierno lo actua pa preveni cu e trabounan pa crea un beach lo continua, en espera di e siguiente pasonan legal” e mandatario a sigui bisa. 

BALANSA ENTRE CONSTRUCCION Y NATURALESA

Minister Arends ta reitira cu pa logra un desaroyo economico sostenibel ta rekeri un balansa entre construccion y naturalesa. Den nos estado di derecho ley y condicion t’ey pa cumpli cun’e y ta conta pa tur. Esaki ta inclui proteccion di naturalesa. Gobierno ta evaluando su siguiente pasonan, teniendo na cuenta e interes general di pais Aruba y e derecho di tur esnan envolvi.

REACCION LAAT?

E pregunta cu ta bin dilanti, ta con bin e mandatario a reacciona asina ‘laat’ despues cu prome minister a informa di su reclamo, y tambe cu a wak e fayo te cu diadomingo, y cu no por a mira e fayo mas prome for di diabierna cu a tuma e decision anterior. Laat pasobra ta diadomingo numa e splicacion a bin, siendo cu a tuma dos dia pa por a ripara e fayo aki. Comentarionan riba caya ta papia di un blunder cometi y cu esaki ta un tipo di damage control pa evita un posibel crisis den gabinete Wever Croes.