De Kort: Danki na articulo di prensa, Corte a descubri cu a lubida procesa un caso di apelacion

ORANJESTAD – Ta danki na un articulo di prensa cu un caso di apelacion por a wordo trata aña pasa ainda. Asina presidente di Hof, mr Mauritz de Kort a relata dialuna durante e conferencia di prensa pa presenta e relato di aña 2022. Segun de Kort, ta danki na atencion di un trahado di corte cu a tuma nota di un articulo di prensa unda cu sindicato di WEB esta VWI ta reclama tardansa den un caso di apelacion, cu Corte a bin ripara cu enberdad e caso no a keda trata y procesa. Como tal e presidente a pidi pa prensa sigui mantene Corte skerpi. 

E CASO

Segun e presidente, tabatin un articulo cu e sindicato di WEB (VWI) a saca reclamando cu nan a apela un sentencia di huez y ainda e caso no a wordo trata, y cu a dura 2 aña y nada ainda. E articulo a sali na maart di e aña aki y tabata publica den Noticiacla.  “Si no ta pa un colega (di corte:red) cu toevalig a mira e articulo aki den prensa, nos (no) a bin saca afo, pasobra nos a bay check e ora kico a pasa, cu berdad ora di e traspaso di e caso di Aruba pa e combinacion di apelacion (tres huez na Corsou) e traspaso eynan no a bay bon” de Kort a admiti. “Kier men nos a perde e caso for di bista!”. E ora e presidente a bisa cu a busca tur documentonan bek, y cu tabata digital, pa e caso ainda por a wordo apunta na un grupo di tres huez pa e apelacion por a wordo trata mas lihe posibel, pasobra e tabata un caso sumario. 

WEDERHOOR

Loke si e presidente a haya falta ta e relato di banda di Corte. Osea cu a busca solamente banda di e sindicato, pero no a haci intento pa busca e version di Corte siendo cu tin un huez dedica na prensa cu por contesta tur esaki. A cuestiona dicon a duna solamente un podium pa trece e noticia di e tardansa di apelacion. Algo cu por a wordo evita.