Opinion: VWI tin dos aña wardando sentencia di caso di hoger beroep

Opinion: VWI tin dos aña wardando sentencia di caso di hoger beroep

Posted on 04/4/2023 3:08 pm AST | Updated on 04/4/2023 4:01 pm AST

Scirbi pa Vereniging van Werknemers met een Individuele Arbeidsovereenkomst in dienst van de Water- en Energiebedrijf Aruba (W.E.B.) N.V.  

Maart 31, 2023 a pasa y cu esaki a cera prome kwartaal di aña 2023. Cu e ciere di maart 2023, VWI ta cumpli dos (2) aña cu a entrega su apelacion den Hoger Beroep pa cu e uitspraak di Gerecht in Eerste Aanleg di 10 di maart 2021 riba e kort geding cu VWI-Vereniging a span contra W.E.B. Aruba NV pa loke ta trata e decision unilateral di WEB pa corta entrada di su trahadonan cu 12.6% pa henter aña 2021. Manera ya ta conoci caba, hues mr. J.M.J. Keltjes a duna su uitspraak riba 10 di maart 2021, cual uitspraak no tabata na fabor di VWI-Vereniging. E mes un dia ey tambe, Gerecht in Eerste Aanleg a core saca un “comunicado di prensa” anunciando den tur medio di comunicacion e uitspraak hues Keltjes. Esaki no ta un practica usual di nos corte di husticia.

Despues cu VWI a tuma nota di e uitspraak di corte, VWI a busca conseho di su consehero legal y tambe di otro huristanan riba e uitspraak aki di corte. Tur, pero tur feedback cu VWI a haña for di esnan cu conocimento di e materia ta cu e uitspraak di hues Keltjes ta “kort door de bocht” y cu no ta cuadra cu jurisprudencia existente. E uitspraak riba e kort geding K.G. nr. AUA202100225 ta, conforme varios huristanan unda VWI a busca nan opinion, por lo minimo un uitspraak “straño”.

VWI, den e mes un luna di maart 2021, a apela e sentencia di hues Keltjes den un Hoger Beroep na Gemeenschappelijk Hof van Justitie (“Hof”). Awe, comienso di april 2023, ta bay haci dos aña cu ainda no tin un vonnis di Hof riba e Hoger Beroep someti pa VWI. Riba 20 di september 2022 e caso di Hoger Beroep (AUA202100053KG) pidi pa VWI na Hof tabata riba “rol” pa duna vonnis. E vonnis a wordo postponi. Dia 15 di november 2022 e mes un caso aki ta riba rol pa duna vonnis y atrobe esaki a wordo postponi. E ultimo rolbehandeling di Hof tabata esun di 28 di maart 2023 y e caso di Hoger Beroep di VWI no ta aparece riba e rol mes!

Puntrando rond na personanan mas conoci cu e mundo di Hof, VWI ta bin haña e imprecion cu e postponimento continuo aki pa duna un vonnis pa cu e Hoger Beroep riba un kort geding ta algo cu no ta normal den circulo di corte di husticia. Segun feedback cu VWI a haña riba e uitspraak di hues Keltjes di 10 di maart 2021 unda cual tur experto cu VWI a puntra a bisa cu e uitspraak di e kort geding ta uno hopi straño. Tambe e echo cu Gerecht in Eerste Aanleg ta core publica un comunicado di prensa den un cantidad di medio di prensa dunando un “splicacion” di e uitspraak di hues Keltjes ta un maniobra cu no ta algo normal pa nos corte di husticia den prome instancia.

VWI no ta participa den “conspiracy theories”, pero e curso cu e tardansa aki di Hof pa duna un vonnis concreto riba e uitspraak di kort geding KG nr. AUA202100225, VWI vs WEB, ta tumando, y e indole mes di e uitspraak di e kort geding sigui pa un publicacion pura pura den medionan di comunicacion ta duna toch material pa cuminsa pensa cu Hof mes no ta riba un liña pa cu e vonnis di e Hoger Beroep aki. VWI, consehero legal di VWI, y un number di huristanan ta bisa cu e uitspraak di hues Keltjes den e kort geding ta “kort door de bocht” y no conforme cu jurisprudencia existente. VWI no ta expertonan den ley, pero bo no mester ta un experto den ley pa por duna oido na bo intuicion cu ta bisa cu aki algo no ta “jive” manera cu mester ta. VWI ta keda den espera di Hof su vonnis riba e Hoger Beroep entama pa VWI (AUA202100053KG) y ta spera cu pronto e vonnis lo bin na cla. Si e uitspraak di hues Keltjes tabata eroneo, ta verwacht cu Hof lo coregi esaki. Y si Hof ta haña cu e uitspraak di hues Keltjes tabata na su lugar, e ora VWI lo kier haña un splicacion pakico. Den tur caso, e vonnis di Hof ta conta pisa pasobra esaki ta bira jurisprudencia pa casonan den futuro. Opinion di VWI ta cu hinca man unilateralmente den saco di trahado sin un base den ley nunca lo por tin un hustificacion legal.

Directiva General di VWI.

Vereniging van Werknemers met een Individuele Arbeidsovereenkomst in dienst van de Water- en Energiebedrijf Aruba (W.E.B.) N.V. (KvK Nummer H51783.0)

  • Powered by SETAR