Stichting Ambiente Feliz a confirma di ricibi placa, pero nan futuro no ta sigura ainda!

ORANJESTAD - "Stichting Ambiente Feliz ta confirma cu a ricibi un suma parcial di e projectsubsidie te fin di juli pa aña 2023 pa nan localidad Cas Briyante na San Nicolaas". Asina e fundacion su coordinador a confirma diabierna mainta. Esaki ta cuadra cu e loke cu e minister encarga, Rocco Tjon a bisa Noticiacla un dia anterior cu e placa pendiente lo wordo paga. Sinembargo, e fundacion ta bisa adicionalmente, cu no obstante cu a ricibi e placa, e futuro di Ambiente Feliz no ta sigur ainda. 

A RICIBI E PLACA

“Directiva di Ambiente Feliz ta confirma cu a ricibi awemainta un suma parcial di e projectsubsidie di locual a wordo acorda caba pa e proyecto Cas Briyante na San Nicolaas” e informe tabata. Cu e suma aki e fundacion por cubri e gastonan di salario y exploitatie te fin di juli” e fundacion a keda confirma tambe.

FUTURO TA SIGUI INSIGUR

Sinembargo den e mesun carta, e fundacion ta mustra cu cos no ta cla ainda. “E futuro di e localidad Cas Briyante ainda no ta sigur mientras cu no tin claridad ki dia Land Aruba lo cumpli cu e resto di e subsidio” e ta sigui bisa. Nan ta splica mas aleu cu si e fundacion no ricibi e suma necesario pa por cubri e gastonan di augustus te cu fin december 2023, e fundacion lo ta obliga pa cera e portanan di su localidad fin di juli y manda no solamente su empleadonan pero tambe e clientenan cu ta depende di cuido profesional na cas.

CARTA SIN CONTESTA

E directiva a sigurra cu nan a manda varios carta desde september 2022 pa entre otro e propio Minister di Husticia y Asunto Social (Rocco Tjon:red) y Departamento di Asunto Social indicando cu no a cumpli cu e subsidio pa e proyecto pa aña 2023. “Directiva nunca a ricibi un contesta. E fundacion ta spera cu awor si Land Aruba lo ta mas transparante den e proceso di subsidio y lo por informa e fundacion debidamente den un tempo cortico ki dia e fundacion lo ricibi e otro parti di e proyectsubsidie”.

KEN TA STICHTING AMBIENTE FELIZ

Stichting Ambiente Feliz, un fundacion funda na oktober 1986, ta brinda servicio residencial na persona cu limitacion intelectual of multiple. Na september 2021, cu fondo di Sociaal Crisisplan, e fundacion a habri nan porta di nan localidad yama Cas Briyante na San Nicolaas. E localidad situa na Palisiaweg ta ofrece cuido intensivo na persona cu tin 6 aña of mas cu un limitacion multiple. E clientenan ta depende completamente di e cuido di nos guianan profesional cu ta traha hunto cu otro specialista di otro fundacion pa mehora e bienestar y desaroyo di e clientenan.