Maduro: Pa prome biaha gobierno lo presenta 'Voorjaarsnota' na Parlamento

ORANJETAD - Pa prome biaha gobierno lo presenta 'Voorjaarsnota' na Parlamento. E siman aki Minister Xiomara Maduro di Finansa a reuni cu Departamento di Finansa pa asina repasa e detayes di locual ta bira e prome 'Voorjaarsnota,' un 'Nota di Comienso di Aña' den cual Parlamento na comienso di aña caba ta wordo informa di e cambionan den Presupuesto. 

NAJAARS NOTA

Te cu awor nos conoce un 'Najaarsnota,' un 'Nota di Fin di Aña' den cual Parlamento despues di mita aña ta wordo informa di e cambionan den Presupuesto. Basa riba e 'Nota di Fin di Aña' Gobierno ta presenta un Presupuesto Supletorio den cual ta pidi Parlamento aprobacion pa e cambionan si esaki ta necesario. 

VOORJAARSNOTA

Pa duna Parlamento un bista mas tempran di e cambionan necesario den e Presupuesto di Pais Aruba, e minister   ta introduci un 'Nota di Comienso di Aña.' E Nota aki lo keda presenta den e prome mita di aña y esaki tambe lo por wordo compaña pa un Presupuesto Supletorio pa pidi Parlamento aprobacion pa e cambionan. E ultimo aki ainda mester keda dicidi pa Conseho di Minister.

BUDGETRECHT

Cu introduccion di un 'Voorjaarsnota' den e ciclo presupuestario di nos Pais, Gobierno ta brinda Parlamento informacion presupuestario na mas momento den un aña. Segun e mandatario, esaki sigur ta yuda e derecho di 'budgetrecht' di Parlamento di Aruba y ta brinda mas transparencia na pueblo riba con e fondonan publico ta keda uza pa Gobierno.