Migracion illegal pa islanan ABC ta unico solucion pa hopi Venezolano pa sali di miseria

CARACAS – Segun e rapport ‘Transparencia Venezuela’ di 2020, hopi Venezolano ta mira migracion illegal pa nos islanan como e unico solucion pa sali di nan problemanan. Asina Simone van der Zee cu recientemente a publica su ‘Update Regionaal Criminaliteitsbeeld:  Trends in de Dutch Caribbean di   pa 2022-2023 ta bisa. Den su rapport principal, e ta referi na ‘Transparencia Venezuela’  y ta splica e.o. riba e tema ey. “Na Punto Fijo y Coro (hende) ta fia placa pa nan por bandona e pais. Tin por lo menos tres agencia di biahe cu ta ofrece pakete di biahe pa Aruba, Corsou of St Maarten. Paketenen pa Aruba na comienso di 2020 tabata cuminsa na 1700 dollar Mericano. Y pa Corsou e tabata ‘mas barata’ na 1000 dollar. E sumanan ta wordo estableci den un declaracion di debe, y ta wordo cobra mensualmente contra tasa di interes di por lo menos 40%. Ora cu nan no por paga of faya cu pago, ta menasa e persona cu violencia contra famia y amigo na Venezuela. De hecho, e debedornan ta wordo forza pa keda na e pais te ora cu e prestamo ta paga’. “Pa pensa cu e refugiadonan aki por bira victima di traficante di hende no mester hopi fantasia’. Esnan cu ta papia den e rapport, ta bisa cu tin señal ainda riba e islanan ABC di explotacion di refugiado Venezolano door di contratistanan den sector di construccion y hoteleria. E ora nan ta wordo obliga pa comete actonan illegal pa otro, manera asosia pa bandanan criminal’, e rapport ta sigui bisa. NOTA: E potret ta di archivo di noticiacla y ta sirbi solamente pa ilustracion pa e raportahe aki.