Biblioteca Nacional a ricibi varios ehemplar di e buki pa mucha ‘Mihó lat ku nunka’

ORANJESTAD - Directora di biblioteca, sra. Astrid Britten diaranson mainta a ricibi 10 ehemplar di e buki pa mucha titula ‘Mihó lat ku nunka’ di e escritora di Corsou sra. Jenilva (Jenny) Coffi-Alberto. Esakinan a bin como ‘special delivery’ cu sr. Tito Lacle.

Caracter principal den e buki pa mucha, ta un djaca y e ta biba den kamber patras di un kashi paña. E storia ta tocante lesamento y cu nunca no ta lat pa siña lesa y bira un gran lesador. Pronto muchanan por lesa of fia e buki aki na biblioteca na Playa of na San Nicolas. Sra. Britten a keda hopi contento cu Tito a trece e buki pa biblioteca hubenil na Aruba. 

sra. Jenny Coffi-Alberto ta viuda y mama di 2 yiu y ela cuminsa skirbi na 2000. E ta gusta experimenta y ta skirbi cuenta pa mucha pero tambe Haiku. Den siman di ‘Ban lesa’ na Corsou, sra. Jenny ta bishita diferente scol na Corsou pa conta storia y introduci su buki. Otro buki di sra. Jenny ta ‘Het geluk van Kianu’.