Biblioteca Nacional Aruba ta presenta coleccion unico di potret di Aruba na 1903 online

ORANJESTAD - Biblioteca Nacional Aruba (BNA) ta presenta un coleccion di potret di Aruba na 1903 en conexion cu e bishita real na januari 2023. Riba BNA su plataforma digital como tambe e website koninklijkeverzamelingen.nl por wak un coleccion di potret for di e album cu e pueblo di e 6 islanan di e ‘Kolonie Curaçao’ a regala Reina Wilhelmina na 1904. Den coleccion aki tin 32 potret di Aruba. Esakinan a keda publica online via e link https://koninklijkhuis.digital.bna.aw/album1904

BNA tin e album aki den su coleccion como parti di e coleccion ‘Koninklijk Huis – Aruba’ (‘Famia Real – Aruba’) cu BNA ta amplia hunto cu  e.o. Archivo Nacional Aruba den cuadro di e proyecto “Colleccion Aruba” pa e ocasion special di e bishita real na januari 2023. Al momento tin como 1200 items disponibel online via https://koninklijkhuis.digital.bna.aw/

E coleccion cu imahen unico di Aruba a wordo realisa trahando hunto cu ‘Koninklijke Verzamelingen’, Den Haag. E tecnologia di awendia ta haci cooperacionnan asina posibel y tambe intercambio di coleccionnan y asina por duna acceso na coleccionnan special. Pronto e coleccion ta haya mas cu 200 potret aserca for di e otro islanan. Pa cualkier pregunta por tuma contacto cu sr. Peter Scholing (digital@bna.aw). Pa peticion pa uso di e potretnan por wak https://www.koninklijkeverzamelingen.nl/beeldaanvragen