Fin di luna awor dump na Parkietenbos ta cera

ORANJESTAD – Gobierno a recorda e siman aki cu dia 31 di december oficialmente lo ta e ultimo dia cu Dump di Parkietenbos lo ta habri pa publico. Y cu esaki tin pregunta di kico lo cambia p'abo y bo desperdicio? 

Segun informacion di gobierno, ta sigura cu pa e gran mayoria di nos, no lo nota niun cambio. Dicon? Pasobra e compania cu ta busca bo sushi, ta keda mescos, y lo keda busca bo sushi mesun dia mesun ora. E meta ta pa eventualmente logra cu tur hende ta separa sushi na cas of negoshi.   

Pa e sobra di personanan cu ta hardinero, contratista, of ta hiba nan mesun sushi di cas pa Dump, lo tin diferente localidad nobo pa procesa, abase di e tipo di desperdicio. Ministerio di Naturalesa lo publica un "blueprint" (mapa) cu lo indica e diferente localidadnan posibel.  

Entre otro, segun gobierno, ya caba tin confirmacion di e siguiente desperdicionan: 

Green Waste (mata, yerba, palo di mata) - na Ecotech of Johnsons 

Metal, Wacharaca, Bateria etc. - Daltra of ICR Services 

Concreto/Demolicion - APEX  

Taira - Ecotech of Carentra  

Sushi mixto (Cas + Hardin + Otro) - Ecotech  

E ta importante pa compronde, cu mientras e infrastructura pa un economia circular, pa reciclahe etc. ainda no ta na su luga debido, cu ya caba nos tin suficiente solucion basico pa por cera Dump di Parkietenbos, pa asina cuminsa e proceso di tapa esaki pa converti'e den un Parke Solar. 

Lo tin mas opcion den futuro cercano pa caminda pa hiba plastic, glass, y otro tipo di desperdicio, cu e meta cu e companianan aki lo recicla mas tanto posibel.  

Segun gobierno, cualkier paso den e bon direccion, ta un salto grandi pa Aruba. Den e caso aki, moviendo for di un "Open Dump" pa un "Sanitary Landfill", caminda ta compacta y empaketa e desperdicio cu no por a reuza of recicla, ta un salto grandi pa Aruba su medio-ambiente, y esey ta loke Gobierno di Aruba ta para p'esegun nan informacion.