Carlo: Den caso Avestruz, no ta compronde con OM por conclui cu Mansur a comete acto castigabel

ORANJESTAD – Diaranson tabata turno pa e abogado mr Vito Carl presenta e defensa di sospechoso C. Mansur den e caso penal di Avestruz. Mansur ta acusa pa ta participe hunto cu sospechosonan Nuñez, Werleman, Abath y Sevinger di a comete fraude y falsficacion di firma relaciona cu otorgacion di  tereno erfpacht di gobierno, durante dos aña entre 2014 y 2016. Un di e prome puntonan di defensa, manera ta resulta cu e otro sospechosonan, ta cu Ministerio Publico (OM) segun e defensa, ta bruha y mescla doño di compania cu ehecucion a titulo personal. Algo cu e ta disputa seriamente. Mansur tabata parti di e compania Lizner y despues a uni cu Damira pa desaroya proyectonan hotelero. Abogado Carlo a mustra cu no por caba compronde con OM por yega na conclusion cu su cliente Mansur a comete actonan castigabel pa ley den henter e proceso aki. Hasta durante e rekisitorio di OM, no a bin claridad riba esaki segun e abogado. Mirando tur loke tin, e abogado a sigura cu na final e lo pidi absolucion total pa su cliente. Y si toch mester presenta un castigo, pa cualkier motibo cu OM lo tin, pa tin un reduccion considerable di castigo, basa riba e varios puntonan di violacion di norma pa parti di OM. 

UN SI OTRO NO

Loke ta cuestionable pa Mansur, ta con OM ta scohe cierto persona si como sospechoso y otronan no. Esaki siendo cu tur a usa e mesun procedura pa haya tereno, bende accion di compania, pero sin cu nan ta marca como sospechoso, of investiga nan y of obliga nan pa presenta pa interogacion. A haci mencion specifico di dos co sospechoso Osorio y Henriquez como accionista di un di e companianan (Damira), pero no a yama nan pa wordo scucha. “OM no ta actua igual y e ora ta violando e principio di igualdad” e abogado a remarca. 

POR PRUEBA CULPABILIDAD

Segun e abogado, OM nunca lo por prueba cu su cliente a actua a base di titulo personal, cu intention pa of a desaroya e terenonan den proyecto. A splica cu e cliente (Mansur:red) ta un desaroyado nobo y cu a base di su conocemento, ayudo di famia a crea un bon base pa futuro. E hecho cu a mark’e como sospechoso di fraude y falsificador di documento, ta atacha su bon nomber. 

DELICTO OF NO

Parti di e defensa a enfoca tambe riba e material di prueba cu tin of no, cu tin cu mustra cu su cliente y of su co sospechosonan Nuñez y Werleman tabatin intencion of no pa desaroya proyecto pa e compania Lizner y of Damira. “Pa ta co-autor di fraude, mester existi un delito” e abogado a bisa. Den e caso aki pues no tin ningun delito, y de facto tabatin tur intencion pa desaroya e proyecto Damira, y e intencion tey awe ainda. Nunca e intencion tabata basa riba titulo personal segun e abogado. Ademas nunca Mansur a wordo informa cu e mester a keda director y accionista di Lizner te ora cu e proyecto a keda cla cu su desaroyo. Y esey e no a priminti nunca tampoco, e abogado ta sigui bisa. Y tur cos a bay conforme regla y no por papia di trato preferencial. Y mientras kier papia di un delito, basa riba informacion suministra, no por papia di un cooperacion hopi cerca entre cliente y co sospechosonan Nun?ez y/of Werleman y/of Abath y/of Sevinger. Y como tal pruebanan cu lo ta usando no por word declara legal y convincente contra e co sospechosonan Nun?ez, Werleman, Abath, y Sevinger  .

DOCUMENTACION

Mansur ta sigura cu e la firma tur peticion pa tereno como director  di su compania, pero no tabatin ningun envolvimento riba e formulacion y entrega di e documento(nan). Tur a wordo traha y entrega pa medio di e otro personanan incluyendo abogado, y como tal no por papia cu e lo a falsifica documentonan. A base di tur e material usa como supuesto prueba, no por prueba e hechonan castigabel legalmente y convincente y como tal mester declara Mansur liber, segun su abogado Mansur. Manera raporta caba tambe, e abogado a pidi cu si toch OM sinti cu nan ta admisible cu nan puntonan, y cu nan material por wordo proba como convincente y legal, cu su cliente merece un castigo seriamente reduci, basa riba e fayonan cu OM a comete den su normanan legal usa. Ademas enbes di castigo di prizon ta pidi e ora pa trabou comunitario y of un multa. E abogado ta considera e castigo pidi, como exuberante y cu den henter Reino, e no por a haya un castigo igual pa un caso semehante pa un persona cu no ta ambtenaar. Y despues e abogado a termina su defensa.