Hof ta permiti matrimonio di mesun sexo na Aruba!

WILLEMSTAD/ORANJESTAD – Den un sentencia considera como algo historico diamars mainta di Corte Supremo (Hof) na Corsou, transmiti via video link pa Aruba, a dicidi cu matrimonio pa personanan di mesun sexo ta posibel na Aruba, y asina a destrui e sentencia anterior contra Fundacion Orguyo Aruba di 2021. Corte a tene cuenta cu tur punto den ley y constitucion di Aruba y no por haya un caminda cu mester prohibi esaki mas. A culpa gobernantenan di no a haci nan trabou door di adapta e ley aki y como tal mester a interveni varios biaha caba y manda e mensahe pa gobierno. Ni asina gobierno no a reacciona pues awor a dicidi cu ta tuma e decision pa gobierno. 

CASACION

Mientras cu Hof a permiti awor pa e casamento di personanan di mesun sexo tuma lugar, e hues a bisa si tambe cu e sentencia aki no kier men cu mayan mes un pareha di mesun sexo por bay casa, pasobra e proceso aki tin cu cana su caminda, unda cu mester por duna contrincantenan e chens pa bringa esaki den casacion, y mester duna gobernantenan e tempo pa adapta e ley consecuentemente. Esey no ta kita afo, cu corte a haya su mes ta haci trabou di gobernantenan, pasobra nan tabata mucho ‘laks’ den esaki. 

OBHECION

A trata tur punto di obhecion, entre otro si mayoria persona na Aruba ta contra of pro, si religion ta permiti esaki si of no, etc, pero tur esaki no tabata argumento suficiente segun Corte, pa n permiti un pareha di mesun sexo pa casa. Loke no ta na discusion awor ta e tema di adopcion pa parehanan di mesun sexo. Pa awor, ta keda pendiente kico ta pasa cu contrincantenan si ta bay casacion y pa despues e trabounan cuminsa pa cambia ley y permiti realmente pa personanan di mesun sexo casa na Aruba. Fuera di Aruba, tabatin tambe un sentencia pa Corsou riba e mesun tema. Pues, e personanan na Aruba di mesun sexo por casa pero no por adopta un yiu. E sentencia aki no ainda no ta completamente valido, pa motibo cu por bay casacion ainda. Por wak e sentencia completo AKI.