Embahador di Reino Hulandes na Venezuela a reuni cu Aruba riba reapertura di frontera

ORANJESTAD – Embahador di Reino Hulandes na Venezuela Robert Schuddeboom a reuni cu minister di husticia Rocco Tjon e siman aki, riba entre otro e reapertura di frontera cu Venezuela. Durante e reunion aki, Aruba a duna un splicacion amplio di e grupo di trabou cu ta preparando pa cu esaki, como tambe e analisisnan pa loke ta e impacto di esaki, teniendo na cuenta e parti di siguridad. 

REAPERTURA GRADUAL

Aruba a duna di conoce caba cu, na un manera gradual, lo kier habri e fronteranan bek, pa cual motibo tin un grupo di trabou actualmente cu ta haciendo un analisis di kico lo ta e impacto di esaki. E punto di salida ta cu, lo kier haci e reapertura na un manera responsabel, y pa e motibo aki, mester tene cuenta cu diferente faceta pa cu esaki. 

SITUACION VENEZUELA

Sr. Schuddeboom tambe a splica kico e situacion ta actualmente na Venezuela, como tambe con nan ta wak e parti di reapertura. Ta asina cu lo ricibi un actualisacion cada dos siman di e grupo di trabou, y tur e trabounan cu nan ta prepara pa loke ta e impacto den cuadro di e contexto financiero tambe, cual ta un punto cu tambe a wordo treci padilanti.