Corte a suspende decision di minister Croes pa prohibi entrada di ambtenaar na Dimas

ORANJESTAD – Corte di caso di ambtenaar awe (dialuna) a destrui e decision di minister Glenbert Croes (Labor) pa prohibi entrada na e trahado di Dimas, Jaqueline Harewood pendiente un keho entrega, cu ta den tratamento. E prohibicion, segun documento di corte, lo tabata pasobra e minister a ‘tende’ cu lo ta tin iregularidadnan tumando lugar riba tratamento di casonan di asilo politico, pa cual e persona en cuestion (Harewood:red) ta responsabel. A base di esey, a prohibi entrada na Harewood pa evita cu e lo por ‘deshaci’ di documentonan importante. Corte sinembargo no a bay di acuerdo y a destrui e decision ey. 

E CASO

Corte a splica cu un ambtenaar por pidi Corte di ambtenaar pa un decision inmediato di un caso, debi cu e situacion ta uno desproporcional pa cu e ambtenaar. Corte den e caso aki ta haya cu enberdad tabatin un desventaha desproporcional pa cu e ambtenaar. A sigui tambe cu por prohibi un ambtenaar entrada, dependiendo e motibo y e mester ta mas limita posibel conforme e motibo di e prohibicion. Corte den e caso aki tambe a cuestiona e autoridad cu cual e minister a tuma e decision y a determina cu e investigacion cu ta tumando lugar, no ta uno discplinario sino basa riba supuesto iregulardadnan pa cu e forma di traha di e ambtenaar pa cu casonan di asilo. Ademas Corte ta mustra cu presencia na trabou di e ambtenaar en cuestion, no ta stroba e tipo di investigacion cu ta tumando lugar. Y como tal, Corte no ta haya cu tin base pa prohibi e ambtenaar entrada na su trabou. Como tal Corte a otorga e peticion di e ambtenaar, Harewood, pa e bolbe su trabou. Consecuentemente, Corte a suspende e asina yama ‘toegangontzegging’ mesora, cu ta nifica cu e ambtenaar por bolbe su trabou. Por lesa e sentencia completo AKI.