Diabierna RMR ta dicidi si ta duna Aruba un aanwijzing of no

ORANJESTAD – Diabierna awor Rijks Minister Raad (RMR) ta dicidi riba e tema di aanwijzing pa Aruba. Siman pasa ainda secretario di esado Hulandes Alexandra van Huffelen a confirma esaki na Tweede Kamer. Segun un encuesta cu Noticiacla a haci fin di juli di e aña aki ora cu CAFt a anuncia e conseho, 45% di esnan encuesta a bisa di ta kere cu Aruba lo haya e aanwijzing aki. Pregunta ta si Aruba durante e ultimo lunana aki a logra convence Hulanda pa e no haya e aanwijzing aki, y mas importante, kico e la priminti Hulanda di haci (ainda) pa evita e aanwijzing. 

E ENCUESTA

Manera cu e portal a raporta NoticiaCla a lansa e encuesta riba e impasse entre Gobierno di Aruba y di Hulanda. A recorda e lectornan cu manera ta conoci, Gobierno di Aruba a purba haya aprobacion di Gobierno Hulandes pa aproba e pago di e 5% na trahadonan publico. Gobierno di Aruba sinembargo no a logra pa convence Gobierno di Hulanda pa aproba esaki y a dicidi cu ta dal bay y paga e 5% sin aprobacion di Hulanda. Noticiacla kier midi e opinion riba e loke a sosode y haci algun pregunta mas. Entre nan si a haya e decision di gobierno uno bon of no, y kico nan ta kere cu e consecuencianan lo ta pa cu esaki. 

CONSECUENCIA

A sigui e parti di e posibel consecuencia cu esaki por tin pa Aruba. Aki 45% a pensa cu e consecuencia lo ta cu Hulanda lo duna Aruba un Aanwijzing (Un instruccion di Hulanda con pa goberna). E siguiente grupo cu a haya mas sosten, ta e 25% cu ta pensa cu Hulanda ta sigui negosha cu Aruba y hunto ta resolve e asunto, pues cu e no tin consecuencia negativo pa Aruba. E otro consecuencia, uno mas serio ta  di 19% cu ta pensa cu Hulanda lo duna Aruba un Algemeen Maatregel van Rijksbestuur (Ta tuma e timon di gobierno over). Y finalmente 12% ta pensa cu nada lo sigui pasa pasobra Aruba ta autonomo y cu e lo regla su propio asuntonan.