Encuesta: Aruba no mester a ‘desobedece’ di Hulanda siman pasa door di paga 5% toch

ORANJESTAD – Segun resultado di e ultimo encuesta haci entre lectornan di NoticiaCla.com cu a participa y contesta e pregunta, 63% ta haya cu Gobierno di Aruba a haci malo door di aproba pago di e 5% cu a kita anteriormente na trahadonan publico, ya cu e ta viola asina un acuerdo cu tabatin cu Hulanda. Y como consecuencia, 45% ta pensa cu esaki lo nifica cu Aruba lo haya un aanwijzing a consecuencia di e ‘desobediencia’ aki. Un total di 717 persona a participa na e encuesta cu a dura 5 dia unda cu mayoria persona tabata di edad entre 45 y 55 aña di edad. 

E ENCUESTA

Manera cu e portal a raporta, diaranson NoticiaCla a lansa un   encuesta interesante aki. E tema tabata riba e impasse actual entre Gobierno di Aruba y di Hulanda. A recorda e lectornan cu manera ta conoci, Gobierno di Aruba a purba haya aprobacion di Gobierno Hulandes diaranson pa aproba e pago di e 5% na trahadonan publico. Gobierno di Aruba sinembargo no a logra pa convence Gobierno di Hulanda pa aproba esaki y a dicidi cu ta dal bay y paga e 5% sin aprobacion di Hulanda. Noticiacla kier midi e opinion riba e loke a sosode y haci algun pregunta mas. Entre nan si a haya e decision di gobierno uno bon of no, y kico nan ta kere cu e consecuencianan lo ta pa cu esaki. 

DESAPROBA

Entre esnan cu a participa, 63% tabata di opinion cu Gobierno di Aruba a haci malo. Esaki, pasobra tin un acuerdo cu Hulanda y mester respeta esaki. Di otro banda 32% a bisa cu Gobierno di Aruba a haci bon ya cu ta Aruba su asunto ki decision ta tuma na cas. E otro 6% a bisa cu e no ta suficientemente informa pa por opina. 

COSTA ARUBA PLACA OF NO?

A sigui cu e siguiente opcion unda cu tin ta pensa cu e stap aki cu Gobierno a hasi lo afecta Aruba financieramente. A puntra e lector kico e ta pensa di esey. Aki 65% a pensa cu si,’paso Hulanda no lo manda niun placa mas’. Mientrastanto 19% a pensa cu no necesariamente nos ta keda pega pasobra nos lo purba di bay fia mas placa otro caminda.

CONSECUENCIA PA ARUBA

A sigui e parti di e posibel consecuencia cu esaki por tin pa Aruba. Aki 45% a pensa cu e consecuencia lo ta cu Hulanda lo duna Aruba un Aanwijzing (Un instruccion di Hulanda con pa goberna). E siguiente grupo cu a haya mas sosten, ta e 25% cu ta pensa cu Hulanda ta sigui negosha cu Aruba y hunto ta resolve e asunto, pues cu e no tin consecuencia negativo pa Aruba. E otro consecuencia, uno mas serio ta  di 19% cu ta pensa cu Hulanda lo duna Aruba un Algemeen Maatregel van Rijksbestuur (Ta tuma e timon di gobierno over). Y finalmente 12% ta pensa cu nada lo sigui pasa pasobra Aruba ta autonomo y cu e lo regla su propio asuntonan. 

CONCLUSION

E conclusion di e encuesta aki ta cu algo mas cu 50% ta pensa cu Aruba lo no mester a firma, pero riba e consecuencia cu Aruba lo tin, e ta mas dividi unda cu algoo menos cu 50% ta pensa cu ta bay haya aanwijzing (instruccion) vs 25% cu ta pensa cu lo sigui normal cu e combersacion y negosacion pa yega na otro di un forma satisfactorio. 

DISCLAIMER 

Manera semper, e resultado di e encuesta aki, ta pa metanan puro noticioso. Ademas, tambe, no ta pretende cu e resultadonan obteni ta un refleho di Aruba completo, sino di usuarionan cu tin aceso na e portal noticiacla. Un total di 717 persona a participa na e encuesta (e mester ta minimal 500 pa por tin un representacion), di cual mayoria tabata hende homber den e caso aki.