Van Huffelen: Dia 21 di oktober RMR ta dicidi riba aanwijzing pa Aruba

DEN HAAG – Conseho di minister di Reino dia 21 di oktober ta dicidi riba e asunto di aanwijzing pa Aruba. Awe diabierna mainta durante un conferencia di prensa entre secretario di estado Hulandes Alexandra van Huffelen y prensa di Aruba e pregunta a bin, y e mandatario Hulandes a confirma cu e la ricibi e zienswijze (e splicacion/defensa di gobierno di Aruba contra e aanwijzing. “Nos tin cu reacciona eyriba y esey nos lo haci den e RMR di dia 21 di oktober, manera cos ta mustra aworaki” e mandatario a bisa. “E ora nos lo contesta esey”. 

COMBERSACIONAN

E portal aki a compronde cu mientrastanto tras di cortina tin combersacionan andando entre gobierno di Aruba y e mandatario Hulandes y cu e combersacionan aki por ta determinante si e conseho final ainda ta bira cu Aruba ta haya un aanwijzing of no. Aruba ta purbando di convence Hulanda cu nan no tin motibo di haya un aanwijzing, mientras cu e colegio di supervision financiero pa Aruba CAFt ta haya cu Aruba a falta suficientemente cu cumplimento cu no ta keda nada mas di usa e medio mas severo pa forza Aruba drecha (den e caso aki) e presupuesto di pais Aruba di 2022. 

CONSECUENCIA SI ARUBA NO HAYA AANWIJZING

Tin tambe e discusion kico ta pasa si Aruba no haya un aanwijzng finalmente, y cu e logra convence Hulanda (RMR) di esaki. Ta papia primordialmente riba e derecho di existencia di e colegio, si RMR no sigui e conseho di nan. Hopi ta pensa cu si RMR no duna Aruba un aanwijzing, esaki ta un ‘brevet van onvermogen’ pa CAFt, y cu no ta tuma nan na serio pa cual nan por bien entrega nan funcion bek na gobierno Hulandes, cu ta nan ‘opdrachtgever.