Croes: Minister Arends ta haya ’espacio’ pa dileña maneho nobo pa parkeermeter

ORANJESTAD – Minister Glenbert Croes ta duna su colega Ursell Arends espacio pa desaroya un plan pa e maneho nobo di parkeermeter, prome cu e duna su ‘opinion final’ riba e tema. Asina e mandatario a contesta e portal 24ora.com dialuna mainta durante su conferencia di prensa. Esaki pasobra e periodista a confronta e mandatario cu un grabacion di prome cu eleccion unda cu e mandatario e tempo ey a declara cu ‘ora cu MEP drenta gobierno ta kita tur parkeermeters’. Siman pasa ora cu minister Arends a anuncia cu ta ‘reactiva’ e parkeermeters, mesora a refresca e declaracionan ‘bieuw’ haci pa e mandatario, anticipando un possible conflicto den coalicion, debi na e declaracionan anterior haci pa Croes. 

ANTICIPA CONFRONTACION

Segun Croes, e la anticipa e confrontacion cu e noticia aki, y e la bisa diplomaticamente cu e ta warda e maneho keda dileña prome cu e bisa algo final. E mandatario a duna indicacion cu e no ta mucho pro e idea, y tambe a indica suptilmente cu e tin tur confiansa cu colega Arends lo analisa tur cos bon y atende tur e problemanan di e tema aki, prome cu e bin cu su maneho nobo. Cu esaki, e mandatario ta evita un ‘crisis’ interno den coalicion. Si e mandatario a para ariba su declaracion, esaki por a desemboca den un confrontacion politico.