Meteo: Aruba por haya entre 25 pa 45 mm di awa entre diahuebs y diasabra!

ORANJESTAD - Aruba por haya entre 25 pa 45 mm di awa entre diahuebs y diasabra. Asina meteorologo di Aruba David Barkmeyer di Meteo a informa diaranson merdia. Segun Barkmeyer, periodonan cu awacero di varios intencidad  ta wordo spera di diahuebs mainta trempan 6 di Oktober te Diasabra 8 di Oktober, riba Aruba y cercania ora un ola tropical activo cruza den nos region bayendo west. Desaroyo of no di e sistema aki, e lo trece un chance halto pa awacero modera te pisa localmente cu por trece cantidadnan di 25 te 45 mm durante e period ei. Bientonan di 50 te 60 km/ora por wordo spera den rafaga, especialmente den awacero modera te pisa cu lamper y strena. Awacero modera te pisa por causa molester na cierto partinan.

CONDICIONAN MARITIMO: 

Laman por bira bastante bruto te bruto principalmente na partinan di costa oost te noordwest y laman temporalmente agita na parti zuid y partinan proteha. Un aviso pa boto chikito lo drenta vigor 6 AM diahuebs, pa especialmente partinan oost te noordwest di costa y tambe pa laman habri. Na operadornan di boto chikito ta bai un advertencia pa no aventura cerca di areanan cu awacero of lamper cu strena.

Resumen:

-        Spera 25 te 45 mm di awacero

-        Un aviso pa boto chikito lo drenta ta na vigor 6 AM Diahuebs, especialmente  pa partinan di costa oost te noordwest y lama habri. 

-        Operadornan di boto chikito ta wordo suplica pa evita areanan di awacero y lamper cu strena. Proximo Update: Mayan 9:00 AM of antes si e condicionan ta pidi pa esaki.