Alto Comisario nobo di Aruba a huramenta dilanti minister

ORANJESTAD – Alto Comisario nobo di polis di Aruba Ramon Arnhem a huramenta diamars mainta dilanti minister di husticia Rocco Tjon. Esaki a sosode den presencia di su famia completo. Tabata comienso di e aña aki cu Arnhem a keda scohi for di un un grupo di solicitante. Algun siman pasa e la yega Aruba y e siman aki e la cuminsa traha oficialmente den su funcion nobo. 

RAMON ARNHEM

Algun tempo pasa den e programa Noticiacla LIVE, e minister encarga  a bisa cu ora cu a dicidi cu e persona menciona recientemente, Ramon Arnhem a keda selecciona, a haci un peticion pa asina yama ‘asistencia tecnico’, bou di cual e tambe ta cay, cu ta haci cu no tin cu costa Aruba mas placa pa atrae un persona di afo pa haci e trabou aki. Ora cu Hulanda manda personal, e ta cubri hopi di e gastonan aki como asistencia, envez di duna Aruba placa bruto pa asistencia. Nan ta manda e personal aki pa Aruba pa asina e por brinda e asistencia tecnico cu nan ta bin cu ne, y asina fortifica e departamento, den e caso aki, e cuerpo policial local. E mandatario a sigura cu asina e gastonan ta keda abou. E no a bisa si cuanto e persona aki lo cobra finalmente. Ademas e persona ta keda cu su posicion huridico di Hulanda, mirando cu ta pa solamente 3 aña e ta bin Aruba, pa despues e bolbe Hulanda den su funcion regular.