ATIA: Aruba lo bira impagabel cu aumento di tarifa di utilidad, BTW y inflacion

ORANJESTAD - Aruba lo bay bira impagabel cu aumento di tarifa di utilidad, BTW y inflacion. Esaki tabata e mensahe principal di Aruba Trade and Industry Association (ATIA) diamars atardi. E gremio a raporta cu e la tuma nota di e aumento drastico di tarifanan di awa di WEB y tarifanan coriente di Elmar. Por a premira e aumento aki basta tempo caba basa riba aumento di prijs di crudo mundialmente y inflacion cu Aruba ta importa. Ta imposibel cu nos companianan di utilidad (WEB y Elmar) keda absorba e aumento di prijs di heavy fuel oil (HFO) pa produci coriente y alaves awa. 

INVERSION

E gremio ta papia tambe riba e hecho cu e companianan di utilidad a anuncia inversionnan cu den futuro lo mester reduci e prijs awa y coriente manera e projecto di Eagle LNG y un windmolen park nobo. “Pero ki dia esakinan ta cuminsa y con esaki lo wordo financia ta  preguntanan clave cu mester puntra y pa ki tempo y cu cuanto e tarifanan lo baha?” ATIA ta puntra. 

PRIJS DI PETROLIO 

Mientrastanto, mundialmente petrolio su prijs ta bahando y ATIA ta recorda cu ariba 1 augustus Minister di Economia Geoffrey Wever a anuncia cu prijs di gasoline lo baha otro siman. ATIA kier claridad pa con largo e ahuste di e prijs di awa y coriente lo ta of si esaki ta un ahuste permanente. 

IMPAGABEL

Pa uso di awa comercial, ATIA a tuma nota cu e prijs a subi cu 26% y coriente pa uso comercial lo subi 24% cu ambos ta un subida drastico. “Esaki hunto cu un inflacion di dobel cifra y e tarifa halto di BTW cu ta na caminda lo hasi Aruba un isla impagabel pa no solamente nos como local pero tambe pa turismo cu ta nos unico pilar economico” ATIA ta sigui bisa.  “Kico esaki lo nifica pa comercio y pueblo di Aruba? E subida di e tarifanan di awa y coriente lo tin como concecuencia cu prijsnan di productonan lo subi. Nos no por lubida cu productonan prijs a subi tambe manera a informa den pasado paso flete a subi y tambe nos ta pendiente pa e BTW cu un tarifa halto cu ta na caminda” e gremio ta finalisa bisando.