Grupo di 4 sindicato a duna gobierno te diabierna pa ‘adapta’ aumento di awa y coriente

ORANJESTAD – E grupo di 4 sindicato di trahadonan publico y e asosacion di interes pa pensionado, esta Sindicato Aduanero di Aruba, SADA, Sindicato di Empleadonan Publico y Priva, SEPPA, Sindicato di Maestro di Aruba (SIMAR), Sindicato di Polis di Aruba (SPA), y  Organisacion di Pensionado di Aruba, (OPPA)a duna gobierno di Aruba te diabierna 5 di augustus proximo, pa wak con por logra ‘adapta’ e aumento recien anuncia di awa y coriente, manera anuncia diabierna ultimo. “Esaki den cuadro di e posicion di esnan mas vulnerable den nos comunidad”, e sindicatonan ta bisa den nan carta manda dialuna mainta. 

AUMENTO

“Pa nos, e subida riba su mes no ta bon” Josephine Albertus di sindicato SIMAR a splica Noticiacla dialuna mainta, dunando mas splicacion riba e carta manda. “Mester busca un otro manera”, e sindicalista ta bisa, pasobra segun Albertus, pasobra no por ta asina cu tur cos ta keda subi anto ta e ciudadano ta esun cu mester paga. “Esaki ta un domino effect. Tienda ta bay subi, airco geld ta bay subi, tur cos ta bay subi. Esey ta loke nos no ta di acuerdo cu ne” Albertus a sigui bisa. E asunto cu tin subida so di prijs, no ta bay yuda nos, e sindicalista a sigui comenta. “Anto gobierno mester wak con nan ta bin cu un solucion”. Aki e ta referi na e acuerdonan den e landspakket actual, unda cu ta papia di e parti di B1, unda cu ta para cu gobierno mester percura pa continuidad den e parti e.o. di awa y coriente. E ta bisa esaki pasobra debi na e aumento anuncia, mas cas ta bay keda sin awa cu coriente, y e problemanan social ta bira mas. “Anto esey ta nos problema” Albertus a sigui busa. Den e carta ta haci mencion tambe di aumento di tarifa di gasoline y otro gastonan cu solamente ta yuda aumenta e problema pa e  consumidor y sigur esnan mas vulnerable. 

PROME NECESIDAD

Den e carta tambe ta subraya cu e aspect di awa ta di gran necesidad y ta cay bou di prome necesidad di e individuo. “Elimina awa ta inhumano y inaceptabel” e sindicatonan ta sigui pone den nan carta. Ta pone tambe den e carta cu bou di e miembronan di e propio sindicatonan tin situacionan manera cu ta wordo describi, y como tal kier un ayudo y contesta, mas tarda diabierna awor. Por lesa e carta completo AKI.