Segun minister, cera dump na Parkietenbos no kier men perde bo trabou

ORANJESTAD -  Cera dump na Parkietenbos no kier men perde bo trabou. Asina e minister responsabel pa e compania Sui Generis Serlimar, Ursell Arends a bisa un grupo di trahado e siman aki. E mandatario a reuni cu e trahadornan di Serlimar na dump di Parkietenbos e siman aki. Den presencia di team di maneho, representante di raad van toezicht, representante di sindicato, y e trahadornan a scucha e preocupacionnan cu e trahadornan a expresa encuanto nan posicion laboral despues di ciere di dump, plania pa fin di aña 2022.  

CERA DUMP Y PERDE TRABOU?

Entre otro e trahadornan a comparti nan miedo cu ciere di dump ta nifica perde trabou, algo cu minister Arends a informa no ta corecto. Aki ta splica cu “ciere di dump” ta nifica cu lo redirigi tur desperdicio, y asina no lo benta nada mas riba Parkietenbos. Riba e tereno di Parkietenbos, e intencion ta pa tapa e sero, y ariba di esey instala panelnan solar.  

CREA OPORTUNIDAD

E minister a splica tambe cu e proposito di Parkietenbos den su totalidad ta ensera cu ta crea oportunidadnan pa bira mas fuerte den su tarea principal di coleccion di desperdicio.  E minister a refuta tambe e posicion di tin e intencion pa laga e trahadornan di e dump riba caya. Di su banda desde cu ela asumi su responsibilidad como minister e la hinca tur su empeño pa rescata nos compania nacional cu ta practicamente bancarota. 

AHUSTACION NECESARIO

Durante e reunion a duna un splicacion na tur presente riba e plan y maneho di desperdicio cu lo ta uno moderno cu ahustacionnan necesario. E meta ta pa redirigi mas hopi desperdicio posibel pa nan no yega ningun landfill y asina stimula un economia circular. “Nos mester compronde, cu e bom di Parkietenbos a rementa hopi tempo caba. Como minister, como pueblo, como pais, nos tur mester asumi nos responsabilidad y tin un actitud habri pa e cambionan necesario” e mandatario a finalisa bisando.