CAFt a conseha RMR pa duna Aruba un aanwijzing!

ORANJESTAD – Manera por a spera, e colegio di supervision financiero CAFt diaranson merdia a conseha Rijks Ministerraad (RMR) pa duna Aruba un aanwijzing, (KB), pa incumplimento pa traha e presupuesto 2022 segun norma stipula conforme e ley di LAFt. Den un conferencia di ultimo ora diaranson merdia, prome minister Evelyn Wever a confirma cu nan a ricibi un copia di e carta for di CAFt, cu a wordo manda pa RMR. Mes momento sra Wever a sigura cu Aruba ta sigui na mesa cu Hulanda, no obstante e menasa pa un aanwijzing, pasobra conforme e ley di LAFt, Aruba ta haya un chens awor pa e mes splica RMR di e situacion, envez di CAFt. E mandatario a confirma tambe cu a combersa cu secretario di estado Hulandes Alexandra van Huffelen. Por a spera e noticia aki despues cu e siman aki minister di finanzas Xiomara Maduro a confirma na noticiacla cu apenas 3 di e 13 recomendacionan haci pa CAFt a wordo cumpli cune pa drecha e presupuesto. CAFt tabata hopi cla cu si no cumpli cu tur 13, lo a conseha pa e aanwijzing. Y ora cu e mandatario a pone riba e pagina di FB di gobierno, cu e asunto cu CAFt merece un 'pleito', tabata obvio cu gobierno di Aruba lo no a cumpli. Despues e mandatario a pone riba su pagina cu ta prensa (noticiacla entre otro) tabata specula cu lo ta bin un KB (aanwijzing) y a sigura cu no tin un KB riba mesa di RMR. Awe noticiacla a haya razon atrobe. 

DEFENSA

Manera por a spera tambe, gobierno di Aruba a duna henter un splicacion atrobe riba e situacion cu e meta pa trankilisa comunidad cu Aruba a haci tur cos necesario pa traha corecto no obstante e critica cu a haya di CAFt. A opta pa bay den detayes (atrobe) pa splica kico tur a wordo haci y ta haciendo, y te hasta a mustra cu CAFt tin fayo den cierto forma pa no a actua for di tempo cu AVP tabata goberna e isla y a mas bien permiti pa e gabinete di e tempo ey, goberna manera cu e la haya ta bon. 

KICO TA PASA AWOR

E proceso manera ta stipula segun e ley di LAFt ta cu ora cu RMR ricibi un conseho d CAFt pa duna Aruba un aanwijzing, conforme inciso 5 di articulo 12, ta duna gobierno di Aruba un chens pa duna su bista riba e tema en cuestion. Ta despues cu esaki ainda no convence RMR, e ora RMR ta pasa pa duna Aruba un aanwijzing, via gobernador, cu ta nifica cu riba orden di Hulanda, Aruba ta obiga di tuma pasonan pa drecha e presupuesto en cuestion. Keda pendiente pa mas informacion riba e tema.