Segun minister, Aruba no por cumpli cu tur 13 recomendacion di CAFt

ORANJESTAD – Gobierno di Aruba a cumpli completamente cu apenas 3 di e 13 recomendacionan cu e colegio di supervision CAFt a haci segun e colegio su ultimo reaccion di dia 10 di juni ultimo. Asina e minister a confirma pa noticiacla e siman aki. Esaki ta siendo cu e colegio tabata specifico cu e kier pa Aruba cumpli cu tur 13 y di forma completo. Sinembargo e mandatario responsabel pa finanzas publico, Xiomara Maduro dialuna a contesta noticiacla, cu no tabata possible pa complace e colegio  cu tur. Y e hecho cu no a cumpli ‘cabalmente’ por costa Aruba eventualmente un aanwijzing, basa riba un conseho negativo di e colegio na RMR proximamente. 

E CUMPLIMENTO 

Segun e mandatario su splicacion na e portal aki, gobierno a cumpli cu 3 punto completamente, a rechasa 3 punto, y e otro 7 puntonan a cumpli  cu nan ‘mas of menos’ osea no cabalmente. Si e colegio no ta convenci cu e loke cu gobierno a manda bek, den e forma cu e la mande, Aruba por e core e risico di haya un aanwijzing si RMR bay di acuerdo cu e conseho final di e colegio. E colegio di nan banda tabata hopi specifico y no a laga espacio pa interpretacion den nan ultimo carta pa e minister. “ CAft ta suplica bo pa a base di articulo 12, inciso 1 di e LAFt) dentro di 14 dia, mas tarda dia 24 di juni proximo, indica riba cua forma bo lo duna contenido na e recomendacionan ariba menciona”, e colegio a bisa den su ultimo carta. Pa cuminsa, gobierno a ‘viola’ e peticion inicial caba unda cu envez di 24 di juni, a manda e contesta te dia 28 di juni, pues no a cumpli cu tempo stipula. CAFt den su ultimo reaccion a sigiu bisa tambe cu “Si na opinion di CAFt despues di 24 di juni, keda un presupuesto (pa 2022:red) cu sea completamente of parcialmente no ta cumpli cu e normanan di e LAft y e protocol, CAFt lo tin cu avisa RMR”. E punto ta cu e 13 recomendacionan di CAFt tabata e unico forma cu gobierno lo tabata den cumplimento cu e normanan segun e colegio. Den e carta di dia 10 di juni, CAFt a mustra gobierno caba cu segun nan interpretacion, ta solamente un di e recomendacionan (number 13:red) gobierno a cumpli cu ne y e otro 12 nan no.  

SPLICACION DI MINISTER

Den dos occasion-  e ultimo siendo dialuna pasa den un conferencia di prensa – e mandatario di finanza a opta pa bay den defensiva contra e colegio, tumando su tempo pa repasa cada un di e 13 puntonan, y splicando kico e consecuencianan lo ta si a cumpli cu e puntonan cabalmente manera cu e colegio di supervision ta sugeri. Entre nan, ta sugeri e ora cu e.o. si corta 28 miyon den servicio y producto lo mester keda sin paga pa gasto di vacuna di COVID-19, no cumpra computer pa Polis, Censo, etc., cera Traimerdia y manda tur trahador cas, no paga cuminda y remedi pa prisonero y adicto, laga edificio John F. Kennedy bashi etc.. Ademas lo mester laga Serlimar bay failliet. no paga ambtenaar 5% di recorte, baha overtime di ambtenaar uniforma drasticamente, hisa loonbelasting bek cu a baha na 1 di januari 2021, cobra Pueblo 20 miyon mas na belasting, corta mas gasto den AZV y laga Pueblo paga mas pa dokter y remedi, no yuda esnan cu malesa cronico, warda pa drecha e sistema di rioleering di RWZI, dus laga e muraya kibra numa y awa sushi bay over banda di hotel, riba Sasakiweg y den lama, corta 286 miyon florin den Presupuesto 2023, pues corta un suma cu ta mas cu full locual ta presupuesta pa Enseñansa of Husticia cu ta ministerionan grandi, cambia pronostico di crecemento economico pa haci manera cu Gobierno lo haya mas placa di economia den 2022, introduci BTW lihe sino mester corta casi 400 miyon den Presupuesto 2023 y finalmente, cobra comercio Subsidio di Salario cu a wordo paga di mas, mas lihe.

CUA A CUMPLI CU NE

For di e mandatario, a compronde cu a cumpli cu e ultimo tres puntonan so completo, esta 11, 12, y 13. Esnan cu e no a cumpli cu ne ta number 2, 3 y 5. E resto di e puntonan, a y ta trahando riba dje parcialmente, pues no completo manera cu CAFt kier, pero algo den e estilo ey y pues no ‘cabalmente’, manera e minister mes a bisa. Segun e mandatario, asina so por a haci esaki y a manda e contesta bek pa e colegio. Awor ta keda na e colegio pa determina si loke a manda, ta suficiente.