Minister ta sugeri cu e 13 recomendacionan di CAFt ta 'bal un pleito'

ORANJESTAD – Mientras cu gobierno di Aruba ta sigura noticiacla cu nan a cumpli ‘parcialmente cu casi tur recomendacion’ di CAFt recientemente, den un post riba Facebook, e mandatario ta sugeri cu e recomendacionan ‘bal un pleito’. Hunto cu e sugerencia aki, e mandatario a pone un relato specifico kico ta nifica si cumpli cu tur e 13 recomendacionan haci. “Locual ta e 13 consehonan di CAFT. Den e post mi a purba pone na e manera mas simpel cu ta posibel kiko cumpli cabalmente lo significa” e mandatario a bisa e portal, refiriendo na e post, pero a confirma pues tambe cu a cumpli parcialmente, pero no a bisa cu cua si a ‘cumpli parcialmente’ y cu a ‘splica CAFt esey tambe’. Ta keda na CAFt awor si nan ta acepta e loke cu gobierno a manda. 

SPLICACION NA CAFT

Segun sra Maduro, Gobierno a splica CAFt na varios ocacion con e sistema na Aruba ta hinca den otro. “Hopi biaha ta compara cu sistema na Hulanda of na e otro islanan, siendo cu tin diferencia” e mandatario a cuminsa bisa. “ Di nos banda, na Aruba nos lo bay duna mas splicacion no solamente na CAFT pero tambe na e publico en general pa asina mas hende por tin e conocemento di cos e sistema ta na Aruba”. Esaki ta pa evita malcomprondemento y cu ta bira saca conclucion robes

E POST RIBA FACEBOOK

Pa loke ta e post di e mandatario riba e Facebook page oficial di gobierno, e mandatario a pone lo siguiente: “Hopi ta critica y bisa cu Gobierno no ta worry y no kier cumpli cu CAFT.  Abo tambe ta pensa asina? Tuma tempo y lesa kico cumpli cabalmente cu tur 13 recomendacion di CAFT pa aña 2022 ta significa” y ta sigui cu e lista completo.  

E LISTA 

E lista di 13 ta wordo splica di e forma aki:

1. Corta 28 miyon den servicio y producto y keda sin paga pa gasto di vacuna di Covid, no cumpra computer pa Polis, Censo, etc, cera Traimerdia y manda tur trahador cas, no paga cuminda y remedi pa prisonero y adicto, laga edificio John F Kennedy bashi etc etc

2. Laga Serlimar bay failliet

3. No paga ambtenaar 5% di recorte

4. Baha overtime di ambtenaar uniforma drasticamente 

5. Hisa loonbelasting bek cu a baha na 1 di jan 2021

6. Cobra Pueblo 20 miyon mas na belasting

7. Corta mas gasto den AZV y laga Pueblo paga mas pa dokter y remedi

8. No yuda esnan cu malesa cronico

9. Warda pa drecha e sistema di rooilering di RWZI, dus laga e muraya kibra numa y awa sushi bay over banda di hotel, riba sasakiweg y den lama.

10. Corta 286 miyon florin den Presupuesto 2023, pues corta un suma cu ta mas cu full locual ta presupuesta pa Enseñansa of Husticia cu ta ministerionan grandi

11. Cambia pronostico di crecemento economico pa haci manera cu Gobierno lo haya mas placa di economia den 2022

12. Introduci BTW lihe sino mester corta casi 400 miyon den Presupuesto 2023

13. Cobra comercio Subsidio di Salario cu a wordo paga di mas, mas lihe.

Na final, e mandatario ta laga e pregunta den aire ‘Ainda bo ta pensa cu e recomendacion nan aki no 'bal un pleito'? #MinFIC”

REACCION DI CAFT y VAN HUFFELEN

Mientrastanto CAFt a confirma pa noticiacla cu nan a ricibi e reaccion di gobierno di Aruba dia 28 di juni ultimo y ta den proceso pa contesta esaki proximamente. Mes momento diaranson, secretario di estado Hulandes Alexandra van Huffelen a mustra su preocupacion pa cu e situacion di Aruba y CAFt den un carta dirigi na miembronan di Tweede Kamer. E ta vigilando e caso hopi di cerca segun e mes a bisa y a pidi Gobierno di Aruba pa atencion riba e asunto.