• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

‹›

• 
• 

Partido MEP a gana eleccion y ta bolbe bira partido di mas grandi

ORANJESTAD – Pueblo a papia y Aruba ta haya un coalicion nobo den Parlamento. For di comienso di anochi por a mira e patronchi cu a establece e anochi, unda cu e dos partidonan grandi a bataya inicialmente cu otro, pa despues e partido MEP tuma e delantera y no a laga esaki los mas. Y di otro banda, e 3 partido chikito a mustra cu nan ta e sorpresa di anochi. Na final, partido MEP a bira e partido di mas grandi atrobe despues di 12 aña cu 20514 voto faltando 1 urna ainda (9 asiento), sigui pa partido AVP 17945  (7 asiento) RAIZ  5430  (2 asiento) MAS 4606 (2 asiento)  y  ACCION21 3361 (1 asiento). Cu e reparticion di asiento, e formacion por cuminsa dialuna, y di experiencia por bisa cu, cu e resultado aki, e partido cu mester tuma e iniciativa pa formacion di un gobierno, ta partido MEP. Si nan no logra, ta purba e ora cu partido AVP pa purba e formacion. 

KICO A PASA

Pa cuminsa, partido MEP a mantene su asientonan cu ta indica cu pueblo a premia e partido y su lider pa e trabou cu nan a desplega, primordialmente e forma con e lider a maneha e crisis di pandemia y e relacion cu Hulanda. Hopi a pensa cu pueblo olo a straf e partido ya cu hopi ta pensa cu perde trabou, salario y mas, lo e pueblo no a aprecia. Pero pueblo a mustra cu na tur, e partido mester haya mas tempo pa por termina e trabou y sigui cu e plan pa recupera Aruba di e pandemia. Partido AVP a perde 2 asiento cu por traduci den e hecho cu p.e. pueblo a sea rechasa e partido su forma di hiba politica e ultimo 3 aña y mey, of ta pa e acontecimentonan legal interno cu a conduci na detencion y encarcelacion di un candidato cu a opta pa toch keda riba lista. E promesanan di p.e. para COHO y renegosha tur cos, trece e salario di trahadonan bek na 100%, asina cu AVP sinta, no tabata suficiente pa mantene nan asientonan. Perde dos asiento ta hopi, y ta nifica cu e partido ta keda den bankinan di oposicion pa un periodo mas. E otro partidonan cu tambe a perde asiento ta POR cu a perde su dos asientonan y partido RED cu tambe a perde su unico asiento. Partido POR for di momento cu e la desintegra cu salida di su fundadornan y varios otro miembro, a wordo mira como un partido morto. Loke no a yuda ta e hecho cu e lider nobo ta un sospechoso di husticia. Aunke cu e lider a sigura cu no mester ‘schrijf af’ e partido ainda y considera e partido como morto, ta un locura, pueblo a dicidi otro y a manda un mensahe cla. Partido RED tambe a wordo gestraft, y a perde algo mas cu mitar di su votonan. Aki por pensa cu ta pasobra e partido no a logra materialisa legalisacion di cannabis, sea medicinal of recreacional. Mientras cu e actitud interesante y no nonsense di e lider a dune e asiento anterior, por pensa cu e pueblo no ta haya esaki asina ‘interesante’ mas y kier algo di diferente. 

PARTIDONAN NOBO

Pa loke ta partido MAS, aunke e partido ta uno renoba, y cu miembronan practicamente desconoci, cu excepcion di e lider, y cu no a core un campaña grandi, pueblo a dune e oportunidad pa continua e trabou cu su lider no a logra caba den e gobernacion actual. Partido RAIZ e biaha aki si a dal un homerun y logra no uno sino 2 asiento, cu ta nifica cu nan ta drenta parlamento porfin y posiblemente forma gobierno. E restructuracion di partido, acopla cu un lista di candidato solido, a pone cu e pueblo a duna nan un chens e biaha aki. Y papiando di chens, e partido ACCION21 cu na cabez un comerciante cu ta habiertamente homosexual, a duna señal cu esey no mester ta un problema y cu e ideanan di e lider ta loke ta mas importante aworaki. 

FORMACION

Un problema por ta e formacion entre MAS y MEP mirando cu MEP ta e partido cu a ‘core’ cu e lider di partido MAS. Di otro banda, MEP a forma cu partido POR na 2017, siendo cu nan no tabata parti un bonchi cu e lider di e partido e tempo ey Otmar Oduber. Y forma un coalicion sin mas cu e otro partidonan, no ta bay ta sin mas. Lider di partido ACCION21 a bisa caba diabierna anochi cu kier cera un bloke di partidonan chikito hunto cu RAIZ y MAS, prome cu nan sinta indivualmente cu un di esunan grandi pa forma e gobierno nobo. Esaki ta implica cu nan lo bin cu nan lista di ‘exigencia’ y ‘condicion’, prome cu forma gobierno. Di otro banda, lider di partido MEP den un programa cu noticiacla, a bisa caba cu e partido cu bin na mesa cu un revolver na cabez di partido MEP, mester baha di e boto ey y fria cabez. Pues MEP lo no entrega facilmente aunke e partidonan chikito por ta e ‘yabi’. 

Dialuna gobernador ta cuminsa cu e combersacionan cu e gremionan comercial sigui pa lidernan di partido cu a ricibi nan asiento. Y despues e gobernador lo dicidi ken ta bira e informador, sigui pa nombracion di un formador. Tempo no ta na fabor di Aruba y como tal no por permiti un tardansa di formacion.