Autoridad di Aruba ta desmenti noticia di avion confisca cu oro for di Venezuela

ORANJESTAD – Gobierno di Aruba y instancianan official manera Directie Luchtvaart ta desmenti e noticia cu varios portal Venezolano ta raporta di cu a confisca un avion Venezolano na Aruba cu lo tabata transporta ‘mas di 900 kilo di oro’. Entre e portalnan, tin ntn24 cu ta raporta cu ta ‘gobierno di Aruba a decomisa’ e avion na aeropuerto di Aruba. “Henter e storia aki ta fictisio y no ta basa riba evento real” ta loke oficina di minister di husticia Andin Bikker a bisa e portal awe mainta. “Nos no por confirma e noticia ey”, director di direccion di Aviacion Civil Edwin Kelly a bisa e portal aki. 

E NOTICIA

E noticia ta core henter weekend, y varios portal latino a duna atencion na esaki, incluyendo uno cu ta conoci di ta basta confiabel, esta ntn24. Asina mes e portal aki (noticiacla.com) a busca reaccion di autoridad local y a haya e reaccion menciona. E noticia mes ta haci mencion cu e avioneta en cuestion, a sali di un zona minera di estado Bolivar, cu identificacion mericano falso. E destino final lo tabata Mexico, pero mester a ‘haci un escala di emergencia’ na Aruba unda cu lo a detene tres tripulante Venezolano. E oro confisca, segun e raportahe, ta papia di 932 kilo exacto, balora na 50 miyon do dollar, empaketa den maleta de luho. E tripulantenan lo ta den proceso di extradicion pa Miami. E parti ey ta haci e noticia mas ‘tendencioso’ ainda mirando e proceso cu normalmente lo tuma pa haci algo asina.