Lampe: Na januari ta implementa plan multiligual pa tur scol na Aruba

ORANJESTAD – Entrante 1 di januari 2018, gobierno lo implementa e plan di scolnan multilingual pa tur scol na Aruba. Asina Minister di Enseñansa, Rudy Lampe, a anuncia durante un conferencia di prensa semanal di gobierno. Banda di esaki, Lampe a anuncia tambe cu basa riba peticion di Fundacion Lanta Papiamento, gobierno di Aruba a decreta 2018 como e aña di Papiamento.

PILOTO

Pa loke ta e implementacion di e scolnan multilingual, esaki ta e resultado di e programa piloto di 5 aña, cu a duna hopi bon resultado segun Lampe, na e dos scolnan envolvi, Colegio San Hose y Colegio Conrado Coronel. Segun Lampe, e resultado tabata ‘sumamente’ positivo, unda cu a resulta e.o. cu e parti competitivo a score hopi halto. Durante e periodo menciona, a test e scolnan aki y awor ta cla pa introduci e plan aki pa tur scol, y mirando e bon resultado, Lampe a sigura cu Aruba ta cla pa esaki riba un base nacional.

IMPLEMENTACION

Mientras cu a anuncia su implementacion pa 1 di januari 2018, Lampe ta consciente cu esaki lo tuma su tempo, pa cual a marca un termino di 10 aña prome cu tur scol na Aruba ta parti di esaki. E prome aña lo enfoca riba e parti di ‘orientacion’, y lo cana dos trayecto, cu ta uno na Papiamento como lenga di instruccion (e scolnan publico, Catolico y otro scol chikito), y pa e scolnan Protestant (Stichting Protestants Christelijk Onderwijs Aruba, SPCOA), lo uza Hulandes como e lenga di instruccion. A basa riba e regla di UNESCO, unda cu ta bisa cu mayoria di e scolnan mester haya les den e lenga materno, cu den e caso aki ta Papiamento.