Bonaire: Bernabela a declara su mes 'independiente' na Bonaire

KRALENDIJK - Oficialmente durante reunion di eilandsraad diamars anochi na Bonaire, ex miembro di UPB Esther Bernabela a declara su mes independiente. Dunando un splicacion amplio, ela mustra cu mientras cu e lider di partido ta sostene, e no ta e loke e tabata kier. "E lider a bisami cu e ta sostene mi. E ta para mi tras. Pero e no mester a para mi tras. E mester a para mi dilanti, bandi mi. Pero no mi tras" Bernabela a bisa, causando hopi aplauso den e sala. Pa loke ta e posibel formacion di un gobierno nobo, esaki ainda no a keda cla pa wordo anuncia. 

GOBIERNO NOBO

E intencion tabata pa diamars anochi caba, partidonan participa kico e plan ta y con e gobierno 'nobo' lo ta hinca den otro. Diamars anochi, fuentenan di NoticiaCla.com a mustra cu pa diaranson nan lo mester 'keda cla' cu e formacion di e gobierno nobo. Manera NoticiaCla.com a raporta anteriormente, tabata despues cu gobierno di patia di Bonaire, esta e coalicion entre partidonan UPB y Democrat a cay diabierna mainta, cu trabounan a cuminsa tras di cortina, pa forma un gobierno nobo. Fuentenan cerca di e proceso, a confirma e momento ey na NoticiaCla.com cu tabatin tres miembro di MPB hunto cu sra Jeanoushka "Nunu"  Raphaela y posiblemente Esther Bernabela cu a benta e gobierno abou, lo tabata papiando cu otro pa un posibel formacion di 5. Manera ta conoci tin 9 asiento y pa tin un gobierno, mester tin por lo menos 5. Ta premira cu pa otro siman diamars anochi ora cu tin un proximo reunion di conseho insular, e formalisacion por tuma lugar di e proximo gabinete. E fuentenan a bisa cu 'pa diamars Bonaire lo mester tabatin su gobierno nobo'. Intentonan pa papia cu lider di tanto MPB y Democrat, no a duna resultado, aunke cu e fuentenan ta cerca di e partidonan y a confirma e intentonan menciona.