Control di polis a produci 95 multa y 7 detencion

ORANJESTAD — Polis di Oranjestad a controla mas cu 400 auto, duna 95 boet y detene siete persona durante un accion di control den trafico y listramento preventivo cu a cuminsa diabierna atardi y sigui te den madruga.

E boetnan tabata relaciona, entre otro, cu rijbewijs, impuesto di plachi di number, seguro y keuringskaart. Dos persona a wordo deteni pa falta di permiso di estadia, dos pa maneha bao influencia y un pa posecion di marihuana.

Unidad Motorisa a detene un chauffeur despues di encontra un boksbeugel den su auto. Un otro persona a wordo deteni pa posecion di municion. Durante e accion, cu a inclui diferente bario y establecimento nocturno, polis tambe a confisca un machete, sker y droga.

Polis a anuncia cu e controlnan lo continua diasabra nochi durante Halloween den diferente distrito. E cuerpo ta recorda conductornan pa tene nan documentonan valido y, si nan bebe, laga un amigo responsabel stuur.