Nisbet: PPA di luto cu fayecimento ex-presidente Virgilio Kock!"

SAN NICOLAS -Partido PPA ta di luto cu fayecimento di su ex-presidente Virgilio Kock. Segun actual lider di partido Benny Nisbet, 'cu dolor na nos curazon, PPA a tuma nota di e fayecimento di sr. Ing. Virgilio Kock. Sr. Virgilio Kock a milita den seno di PPA entre 1967 pa 1985’. 

CARERA POLITICO

Na aña 1967 sr. Virgilio Kock a aparece riba lista di PPA y a bira miembro di Eilandsraad di Aruba.  Na 1970  sr. ing Virgilio Kock a asumi e posicion di Diputado di Teritorio Insular di Aruba encarga cu e.o. D.O.W. cual posicion el a ocupa te na aña 1975. Na  1975 sr. Virgilio Kock a bira miembro di Staten di Antiyas Neerlandes cual posicion el a occupa te na 1979. Durante e periodo di 1977 pa 1979 Sr. Virgilio Kock tabata tambe  Lijsttrekker y Presidente di PPA. Na 1979 el a worde elegi un bes mas como miembro di Eilandsraad pa e periodo 1979 pa 1983. Durante e periodo aki el a sirbi tambe como Lider di fraccion di PPA den Eilandsraad di Aruba.

MAS DI TRAYECTORIA DI VIRGILIO KOCK

Durante su trayectoria e tabata tambe un ‘architecto renombra’ aki na Aruba durante cual periodo el a pone su ‘stempel’ riba varios projecto unda su contribucion tabata grandi e.o. E kapel Emannuel na San Nicolas, Aeropuerto di Aruba y nos Hospital nobo di Aruba. El a ocupa tambe e posicion di director di D.O.W./Obras Publico pa varios aña. Kock tabata tambe Comissario di Banco Central di Antiyas Hulandes y presidente di Volkskredietbank.

UN GRAN ARUBIANO

“Un gran Arubiano a larga nos!!” Nisbet a sigui bisa. Durante su trabou Ing Virgilio Kock tabata eherce su trabou cu un amor grandi pa sirbi su pais su pueblo y e organisacion cu e tabata representa. Mei mei di su seriedad y dinamismo semper e tabatatin espacio pa un chiste…..pero manteniendo e accento riba e seriedad necesario pa finalisa e trabou di representacion di su pueblo.  

CONDOLENCIA

PPA ta manda palabranan di condolencia na su yiunan, su nietonan, su rumannan y demas famia y amistad. Un gran Arubiano a bay sosega! Un bida dedica na sirbi su pais, construccion y creatividad y na su famia stima a yega na su final ora Todopoderoso a yama sr. ing Virgilio Kock den su Reino. PPA lo recorda e contribuccion di sr. ing.  Virgilio Kock na nos pais Aruba  pa semper  cu   Ing,  Virgilio Kock sosega na paz ! Foto cortesia Benny Nisbet.