Tata di Natalee Holloway no ta kere den intencion nobo di van der Sloot

ALABAMA – E tata di Natalee Holloway no ta kere e storia di Joran vd Sloot (28), esta cu e kier basha abou awor si, a cambio di un traslado pa prison na Hulanda. “Despues di tur mi mentira y engaño, ta tempo pa e berdad” van der Sloot a declara na e corant Hulandes Telegraaf diasabra. “E por keda eynan y putri bay” Dave Holloway a bisa di e declaracion di e hoben sospecha di e desaparicion di su yiu muher na 2005 na Aruba.

JORAN VAN DER SLOOT

Joran van der Sloot, cu ta cumpliendo un castigo di prison na Peru pa asesinato, ta purbando di cera un deal cu husticia. Segun un reportage di e reportero di Telegraaf John van den Heuvel cu a combersa cu van der Sloot na Peru, e hoben kier inicia un bida nobo riba e caso di desaparicion di Natalee Holloway. Esey el a declara den un entrevista exclusivo cu e corant. A cambio di un traslado pa prison hulandes e ta dispuesto pa e biaha aki si bisa berdad kico a pasa cu Holloway na Aruba na 2005. Algo cu el a priminti den pasado caba, pero no a cumpli.

CARTA PA EMBAHADA

E lo a tuma contacto via carta cu e embahada Hulandes y ministerio di relacionnan exterior (Hulandes) pa discuti e condicionnan pa un eventual ‘deal’. E ta spera cu unabes e duna contenido na e caso, cu e por sinta resto di su castigo na Hulanda. Ya pa dos aña Peru tin un tratado cu Hulanda cu ta permiti prizoneronan sinta nan castigo otro caminda. Van der Sloot ta cera na Peru pa morto riba e Peruano Stephany Flores cu el a choca y mata na 2010. Di otro banda nunca e no a conta kico a pasa cu Holloway, cu ta prome biaha cu el a bin den noticia. Algo cu awor van der Sloot kier cambia.