ORANJESTAD — E tratamento di e caso penal contra Chania Fernandes Pedra, acusa den conexion cu e hit and run cu a cobra bida di dos peaton na comienso di e aña aki, a keda pospone atrobe diaranson merdia. Despues di un sesion cu peticionnan rechasa, un intento nobo pa reemplasa huez y e anuncio cu abogado Jairon Odor ta asumi defensa, huez a fiha 27 di november pa 8:30 di mainta pa continua e caso. Fernandes Pedra ta keda deteni.
CRITICA FUERTE
E desaroyonan di awe a provoca critica fuerte di Fiscal y di abogado di e famianan di victima, mr. Hatzmann. Durante un interrupcion di e sesion, tension a subi entre famianan den edificio di Corte. Tabatin gritamento y pushamento, y miembronan di CEA a interveni pa restablece trankilidad.
CARTA CU PETICIONNAN
Na inicio di e audiencia, huez a informa cu un dia prome Corte a ricibi un carta di 13 pagina di Fernandes Pedra. Den e documento, e acusado a presenta varios obhecion contra e curso di e proceso y a solicita mas tempo pa prepara su defensa. Un di su argumentonan tabata cu e no tin asistencia di abogado y cu, segun e, material di video ta falta den e dossier. El a cuestiona tambe decisionnan anterior tocante peticionnan pa scucha testigo y a expresa deseo pa un abogado bolbe solicita investigacion adicional, incluyendo un reconstruccion di e accidente. Fernandes Pedra a plantea tambe sospechonan tocante autenticidad di documentonan y e circunstancianan cu a laga e sin representacion legal. E alegacionnan aki no a wordo establece como hecho durante e sesion. Ora huez a pidi aclaracion riba cierto punto, e acusado a invoca su derecho di silencio. Ademas di posponemento, el a solicita pa wordo laga liber pa por prepara su caso.
RECHAZO Y NOBO PETICION CONTRA HUEZ
Fiscal a sostene cu no tabatin base pa un aplaso nobo . El a recorda cu e asunto di asistencia huridico a wordo discuti caba dia 4 di november y a indica cu e acusado a ricibi documentonan di e caso. Despues di considera e carta y e reaccion di Ministerio Publico, huez a rechasa tanto e peticion pa pospone como e solicitud pa libertad. Fernandes Pedra a reacciona presentando un peticion nobo di wraking, e procedura pa pidi reemplaso di un huez ora tin duda tocante su imparcialidad. E acusado a relaciona su peticion cu e forma cu huez a atende su solicitudnan. E tratamento a keda interumpi pa laga e peticion wordo evalua. E peticion nobo contra huez a wordo rechasa, despues di cual e audiencia a continua.
ODOR TA CONFIRMA SU PARTICIPACION
Ora e sesion a reanuda, mr. Jairon Odor a anuncia cu e ta asumi defensa di Fernandes Pedra den e caso penal. Esaki tabata un cambio compara cu inicio di e audiencia, ora el a indica cu ainda e no tabata actua como abogado den e caso, pasobra e no a ricibi henter e dossier. Odor a splica cu apenas un rato prome e mayornan di Fernandes Pedra a confirma cu nan lo cubri e gastonan di su asistencia. Su entrada como abogado defensor a trece e pregunta di cuanto tempo e mester haya pa prepara su mes. Huez a recorda cu anteriormente Odor su participacion tabata limita na e procedura di wraking.
FISCAL Y ABOGADO DI FAMIANAN TA CRITICA ATRASO
Fiscal a expresa frustracion cu e repetido interrupcionnan. Segun e, e famianan di victima a presenta na Corte seis biaha caba, mientras e tratamento ta sigui wordo pospone. El a critica loke, den su opinion, ta un uso di diferente procedura pa retrasa e caso.
Ministerio Publico a sostene cu Odor tabatin oportunidad anteriormente pa asumi defensa y a considera un siman suficiente pa preparacion.
Mr. Hatzmann, kende ta representa e famianan di victima, tambe a cuestiona e actuacion di Odor. El a expresa cu e manera di procede ta un berguensa pa e profesion y a acusa defensa di hunga wega cu e proceso. Su peticion tabata pa continua e caso e siguiente dia.
HISTORIAL DI E PROCESO
E problema rond di asistencia di abogado a causa obstaculo den e caso anteriormente. Dia 4 di november, e tratamento a keda suspendi despues cu Fernandes Pedra a solicita reemplaso di e huez. Un camara di tres huez a rechasa e peticion ey dia 6 di november. Na e ocasion ey, Odor tabata representa e acusado solamente den e procedura di wraking.
Ministerio Publico a lamenta e atraso anteriormente, indicando cu e acusado, e famianan di victima y comunidad tin interes den claridad y un resolucion di e caso. noticiacla.com
DOS VICTIMA FATAL
E caso ta relaciona cu e accidente di 4 di januari 2026 riba L.G. Smith Boulevard, cerca di Renaissance, den cual Josely Paulina Vasquez Gonzalez y Carlos David Vialez Valerio a perde nan bida. Segun Ministerio Publico, Fernandes Pedra tabata conduci un Jeep Compass sin rijbewijs valido y bao influencia di alcohol. E acusacionnan ta inclui homicidio, intento di homicidio y bandonamento di luga di accidente. Corte ainda mester pronuncia su mes riba e acusacionnan. Na final di e audiencia di awe, huez a determina cu e caso lo continua diabierna 27 di november pa 8:30 di mainta. E peticion pa libertad a keda rechasa, haciendo cu Fernandes Pedra ta sigui den detencion preventivo.