Eman ta presenta retonan di Aruba na Kingdom Summit na Sint Maarten

Eman ta presenta retonan di Aruba na Kingdom Summit na Sint Maarten

Posted on 11/18/2026, 10:30 AM AST | Updated on 11/18/2026, 10:30 AM AST

PHILLIPSBURG — Premier Mike Eman y Minister Gerlien Croes ta representa Aruba na e prome Kingdom Summit, cu ta tuma luga 17 y 18 di november na Sint Maarten. E reunion ta reuni e cuatro paisnan di Reino Hulandes pa fortalece cooperacion politico y busca solucionnan comun pa retonan economico y social.

Durante e encuentro, Eman lo presenta e situacion actual di Aruba den un sesion di State of the Nation, cu enfasis riba desaroyo economico, bienestar social y oportunidadnan pa cooperacion cu otro paisnan di Reino.

Un di e iniciativanan cu Eman a menciona anteriormente ta e establecimiento di Wageningen University & Research na Aruba, como ehempel di con cooperacion por contribui na desaroyo di pais.

Minister Gerlien Croes ta participa tambe na e reunion ministerial di Enseñansa, Cultura y Ciencia (M4LO), unda ta trata temanan manera conexion entre enseñansa y mercado laboral, enseñansa multilingue y oportunidadnan pa studiantenan Caribense.

Premier hulandes Rob Jetten no ta participa debi na e crisis politico na Den Haag. Secretario di Estado Eric van der Burg ta representa Hulanda.

E Kingdom Summit ta busca establece un dialogo mas structural entre e cuatro gobiernonan, cu enfasis riba respet mutuo y cooperacion. E encuentro ta premira di conclui cu un declaracion final cu por defini e siguiente pasonan den relacionnan di Reino.