Fiscal ta exigi 15 aña di prison pa homber cu a mutila su tanta

ORANJESTAD — Ministerio Publico a exigi 15 aña di prison contra Adrian Faña, acusa di a mata su tanta, Luz Divina Faña Paulino, dia 2 di november 2025 na Solito. Segun informacion di e caso, e señora di 60 aña a ricibi 33 puñala, despues di cual su curpa a wordo scondi den un freezer den su residencia. Famia di e victima ta reclama Afl. 69.000 na daño y ta pidi pa Faña perde su derecho di herencia riba propiedadnan di su tanta.

CONMOCION

E caso a conmociona comunidad, particularmente pasobra Luz Divina, originalmente di Republica Dominicana, a cria Faña desde chikito como su propio yiu. E señora tabata traha pa hopi aña na restaurant Chalet Suisse na Eagle Beach. Su desaparicion a lanta sospecho despues cu e no a presenta na trabou. Segun investigacion, Faña a declara cu su tanta a biaha urgentemente pa Republica Dominicana. Sinembargo, posteriormente autoridadnan a descubri su curpa den freezer. Despues di e hecho, Faña a abandona Aruba y a termina na Republica Dominicana, caminda autoridadnan a deten'e despues di un buskeda internacional. Na april 2026, el a wordo entrega na Aruba pa enfrenta husticia. Durante investigacion a surgi tambe sospechanan tocante placa di huur di apartamentonan y propiedadnan di e victima. Material di evidencia a wordo manda pa Instituto Forense Hulandes (NFI), mientras rapportnan psicologico y psiquiatrico tambe a forma parti di e proceso.

ABUSO

Segun e acusado, e tabata wordo abusa verbalmente y sexualmente pa hopi aña. Esaki a pone cu e no a soporta mas y a admiti di a mata su tanta y a hui bay sin bisa nada prome pa Republica Dominicana. 

CASTIGO

Cu e exigencia di 15 aña di prizon, Ministerio Publico a presenta su posicion tocante castigo. Sinembargo, Corte ainda mester dicidi riba responsabilidad penal, sentencia y reclamacionnan di famia, incluyendo e peticion pa exclui Faña di herencia.