Famia di Kimberly ta presenta denuncia contra su pareha y marinier den caso fatal di UTV na Aruba

AMSTERDAM — E famia di e hoben Hulandes di 23 aña, Kimberly van Ardenne, kende a perde su bida durante un accidente cu un UTV na Aruba dia 13 di september 2026, a dicidi di tuma pasonan hudicial contra e dos hombernan cu tabata den e vehiculo hunto cu ne. E famia a confirma esaki diabierna pa noticiacla.com. Ademas, segun un relato presenta den un programa Hulandes, abogado di e famia ta presenta denuncia contra su pareha, Thomas K., y un marinier Hulandes, Mees W., relaciona cu sospechanan tocante autenticidad di un video cu a wordo uza den investigacion di e accidente fatal. E desaroyo aki ta representa un paso nobo den un caso cu desde september ta lanta pregunta tocante kico realmente a pasa e dia ey na Grapefield, San Nicolas. Kimberly a fayece despues cu e UTV den cual e tabata a bolter. Su pareha y e marinier a sobrevivi e accidente.

FAMIA TA CUESTIONA VIDEO CU MINISTERIO PUBLICO A UZA

Dia 9 di october, Ministerio Publico (OM) di Aruba a informa cu, segun e resultadonan di investigacion disponibel na e momento, incluyendo grabacionnan di video, Kimberly mes tabata stuur e UTV ora e accidente a sosode. E declaracion ey a bin despues di simannan di duda di parti di e famia, cu desde principio a cuestiona si Kimberly realmente tabata tras di stuur. Sinembargo, e famia no ta convenci di e evidencia presenta. Awor nan abogado ta cuestiona autenticidad di e grabacion y ta solicita cu autoridadnan investiga si por a trata di un video falsifica of manipula. Segun e relato di un programa Hulandes televisa, e denuncia ta basa riba articulo 184, inciso 1 y 2, di Codigo Penal di Aruba, relaciona cu supuesta fabricacion y uso di evidencia falso den un procedimiento hudicial Den su comunicado di 9 di october, Ministerio Publico a sostene cu e evidencia disponible ta indica cu Kimberly tabata e chofer, pero a aclara cu e investigacion ainda no tabata finalisa. 

ABOGADO: "NOS TA WARDANDO CONTESTA"

Durante e programa Hulandes, abogado di e famia a expresa su frustracion cu falta di informacion tocante e investigacion. "Nos ta wardando contesta pa nos por completa e imagen di kico a pasa. Na e momento aki nos no por haci esey, y esaki ta masha doloroso," e abogado a expresa, segun e declaracion presenta den e programa. Segun e, desde e accidente y despues cu diferente circunstancia extraño a surgi, e famia no a ricibi e claridad cu nan ta pidiendo. E abogado a manifesta tambe preocupacion tocante informacion cu el a ricibi di un fuente cu e ta considera confiabel, segun cual por tin irregularidad relaciona cu registracion di e UTV of posibilidad cu e vehiculo tabata wordo huur ilegalmente.

PREGUNTA TOCANTE E DURACION DI INVESTIGACION

Un otro punto di critica ta e tempo cu e investigacion ta dura. Segun informacion menciona den e programa, e famia a compronde cu declaracionnan y rapportnan di investigacion posiblemente lo wordo comparti rond di cambio di aña. E abogado a cuestiona dicon un accidente cu a sosode dia 13 di september mester yega casi na fin di december of cuminsamento di januari prome cu e famia por haya e informacion cu nan ta busca. E famia ta insisti cu nan kier acceso na e declaracionnan, e resultadonan tecnico y e otro informacion necesario pa reconstruí kico exactamente a sosode.  Inicialmente, investigacion di e accidente tabata den man di Cuerpo Policial Aruba (KPA). Posteriormente e caso a pasa pa Koninklijke Marechaussee, debi na involucracion di un militar Hulandes, bou di direccion di Ministerio Publico di Aruba. 

FAMIA TA BIBA DEN DOLOR Y INCERTIDUMBRE

E incertidumbre ta afecta e famia profundamente. Durante e programa, un familiar a describi e periodo desde 13 di september como un epoca sumamente scur. "For di 13 di september te awe, ta un periodo completamente scur," e familiar a expresa. Segun e relato, normalmente cas di wela di Kimberly ta yena di luznan di Pasco durante temporada festivo. Pero e aña aki, e famia no tin animo pa celebracion. "Ningun hende tin animo. Tur hende ta sufriendo," e familiar a expresa. E famia ta sostene cu nan no por encontra trankilidad mientras nan no haya claridad completo tocante circunstancianan den cual Kimberly a perde su bida.

DENUNCIA TA HABRI UN OTRO DIMENSION DEN E CASO

E denuncia contra Thomas K. y Mees W., manera presenta den e programa Hulandes, ta pone un otro aspecto di e investigacion bou di atencion: no solamente kende tabata stuur e UTV, sino tambe si e evidencia utiliza den e proceso ta autentico y confiabel E caso ta pone dos posicion diferente dilanti: di un banda, Ministerio Publico di Aruba cu anteriormente a declara cu evidencia di video ta indica cu Kimberly tabata stuur; y di otro banda, e famia cu ta cuestiona e grabacion y ta exigi investigacion adicional. Mientras e resultado final di investigacion no ta conoci, e pregunta central di e famia ta keda sin un contesta cu nan ta acepta: Kico realmente a pasa dia 13 di september, ora Kimberly a perde su bida den e UTV na Aruba?