Wever: Segundo cambio di presupuesto 2026 ta proyecta surplus di Afl. 112 miyon

ORANJESTAD — Minister di Finansa Geoffrey Wever a anuncia cu Gabinete AVP-FUTURO a entrega su segundo cambio di Presupuesto 2026 na Parlamento, cu un surplus financiero proyecta di Afl. 112 miyon, ekivalente na 1,4% di Producto Interno Bruto (PIB). Segun e minister, e propuesta ta cumpli cu e norma legal di minimo 1% di surplus.

E cambio presupuestario ta incorpora diferente medida dirigi riba mehoramento di poder di cumpra, incluyendo Afl. 400 extra pa luna na reparatietoeslag pa aproximadamente 22.000 beneficiario di AOV y AWW, aumento di asistencia social di Afl. 450 pa Afl. 600 y reduccion di accijns riba gasoline y diesel te fin di aña.

Otro medidanan ta inclui reduccion di tarifa di impuesto riba entrada di 10% pa 0%, mehoracionnan salarial pa personal di enseñansa y aumento di sosten financiero pa gastonan escolar, incluyendo te Afl. 250 pa mucha pa material escolar, cu un maximo di Afl. 1.000 pa famia.

Ademas, Gobierno ta solicita aprobacion di Parlamento pa finalisa un acuerdo cu Stichting Onroerend Goed Aruba relaciona cu construccion di un centro multifuncional (MFA) na San Nicolas y transferencia di derecho di erfpacht na Pais Aruba. Tambe ta solicita Afl. 2,3 miyon pa renovacion di casnan y areanan comunal na De Vuyst y Bushiri. "Cumpli cu e normanan presupuestario ta keda esencial. Alabes, nos ta sigui uza e recursonan di Pais Aruba pa mehora poder di cumpra y calidad di bida di nos comunidad," Wever a declara.

E propuesta, cu ta inclui consehonan di CAft y Raad van Advies, mester ainda wordo aproba pa Parlamento. E surplus di Afl. 112 miyon ta un proyeccion presupuestario, no un resultado financiero definitivo.