Prensa Panameño ta critica falta di gol despues di empate contra Corsou

WILLEMSTAD — Prensa deportivo di Panama a critica e seleccion nacional despues di e empate sin gol contra Corsou, diahuebs anochi den Stadion Ergilio Hato. Segun diferente medio Panameño, falta di efectividad den atake a costa nan ekipo un victoria importante den e lucha pa clasificacion pa semifinal di Concacaf Nations League.

Diario Crítica a califica e resultado di 0-0 como un empate amargo, destacando cu Corsou, bou di direccion di Dick Advocaat, a pone Panama bou di presion desde cuminsamento di e partido.

Apesar cu Panama a domina partinan di e encuentro y a crea varios oportunidad, e atacantenan no a logra marca. Segun canal TVN, Panama a registra 11 remate, cinco riba gol, mientras Corsou a logra cinco remate, dos riba gol.

Prensa Panameño tambe a reconoce e peliger di Corsou, specialmente cu oportunidadnan di Livano Comenencia, Juninho Bacuna y Tahith Chong, kende a dal bala contra palo.

E partido decisivo lo tuma luga diadomingo na Panama. Panama mester gana pa clasifica directamente, mientras un empate cu gol ta suficiente pa Corsou avansa, danki na regla di gol marca como bishitante. Si e partido bolbe termina 0-0, lo sigui prolongacion y eventualmente penal.

E ganador lo clasifica pa Final Four di Nations League na Los Angeles na maart 2027 y sigura participacion directo na Gold Cup 2027.