Hulanda ta mira oportunidad petrolero pa Corsou den relacion cu Venezuela

DEN HAAG — Minister di Asunto Exterior di Hulanda, Tom Berendsen, a destaca cu normalisacion gradual di relacionnan cu Venezuela ta habri oportunidad economico nobo pa Corsou, particularmente den industria petrolero y sector energetico.

Durante un debate presupuestario den Parlamento Hulandes, Berendsen a describi Venezuela como un socio economico crucial pa Corsou. E declaracion a bin despues di pregunta di parlamentario Michiel Hoogeveen tocante e posibilidadnan economico cu cambionan politico na Venezuela por ofrece e isla.

Hoogeveen a menciona specificamente e potencial pa reactiva terminal petrolero di Bullenbaai pa almacenamento y transbordo di petroleo Venezolano.

Berendsen a recorda e relacion historico entre ambos pais, señalando cu refineria di Corsou originalmente a wordo diseña pa procesa petroleo for di Venezuela.

E minister a indica cu acercamento entre Corsou y Venezuela tambe por crea espacio pa atende asunto financiero pendiente, incluyendo debe nan existente entre e dos paisnan.

Durante e debate tambe a haci referencia na un reunion na New York na final di september entre Prome Minister Hulandes Rob Jetten, Prome Minister di Corsou Gilmar Pisas y presidente interino Venezolano Delcy Rodríguez.

E declaracionnan ta señala un perspectiva nobo pa sector energetico di Corsou, aunke no a anuncia ningun acuerdo concreto pa reapertura di actividad petrolero na Bullenbaai of refineria.