300 educador ta atende e peliger di vaping y social media entre hobenan na Aruba

ORANJESTAD — Uzo di vape, dependencia di nicotina, influencia di social media y riesgonan digital entre hobenan tabata e temanan central durante e di tres edicion di Breaking the Silence, organisa pa Stichting Hunto y Directie Volksgezondheid (DVG) na Renaissance Convention Center. E evento a registra participacion maximo di 300 maestro, trahador social y otro profesional di enseñansa.

Dr. Caroline Becker, specialista di pulmon na Hospital Dr. Horacio E. Oduber, a alerta pa e facilidad cu hobenan por desaroya dependencia di nicotina. El a presenta ehempelnan di smart vapes, aparato cu por inclui pantaya, wega y notificacionnan pa stimula uzo continuo. Pa ilustra e cantidad halto di nicotina, Becker a compara un vape di 600 puffs cu dos paki di sigaria, aclarando cu e cantidad ta varia segun producto.

Angela Persad di PRONAD Cariben Consultancy a aborda e peligernan di sexting, sextortion, cyberbullying y e fenomeno di jumpen, caminda agresion of humiliacion di hobenan ta wordo graba y comparti online. Tambe a destaca e riesgonan di imagen falso crea cu inteligencia artificial (AI), cu por provoca problema serio entre alumnonan.

Di su banda, Mary-Ann Kock di DVG a presenta un propuesta di investigacion tocante relacion entre tempo di pantaya, salud di wowo y bienestar mental di muchanan entre 9 y 12 aña na Aruba. E estudio ta proyecta pa inclui aproximadamente 627 mucha.

Segun Stichting Hunto, maestro y otro profesionalnan di enseñansa por desempeña un papel importante den identificacion trempan di cambionan den comportacion y concentracion di alumnonan.

Cu e forum, e organisadornan kier fortalece colaboracion entre scol, famia y profesionalnan di salud pa preveni problema di dependencia, abuso digital y otro riesgonan cu ta afecta hobenan na Aruba.