Corte ta confirma bancarota di American University School of Medicine Aruba

ORANJESTAD – Corte di Husticia a confirma e bancarota di American University School of Medicine Aruba Campus Foundation (AUSOMA), rechazando e apelacion cu e institucion a presenta contra e decision di bancarota cu Corte di Promer Instancia di Aruba a dicta dia 9 di october 2026. E universidad a apela e decision, argumentando cu e no tabata den un situacion di paramento permanente di pago na su acreedornan y cu tabatin speransa di haya sosten financiero pa por cubri su debe pendiente. Sinembargo, Corte a conclui cu AUSOMA no a logra demostra cu e por a cumpli cu su obligacionnan financiero, ni aun si e financiamiento cu e tabata spera riba logra materialisa.

DEBE PENDIENTE TA SUPERA AFL. 1.8 MION

Segun e sentencia di 12 di november 2026, AUSOMA a reconoce cu e tin obligacionnan financiero considerable, entre otro:

Afl. 746,883.20 na Departamento di Impuesto.

Afl. 135,263.18 na SVB.

Afl. 342,026.41 na salario atras di empleadonan.

Afl. 173,927.25 na contribucionnan di pensioen pendiente.

Un resumen financiero presenta door di e universidad mes a mustra un total di debe cu ta supera Afl. 1.56 mion. Mientras tanto, e curado a informa cu acreedornan a presenta reclamonan cu ta supera Afl. 1.81 mion. E curado a indica tambe cu te ainda no a identifica ningun activo den e masa di bancarota.

AUSOMA a argumenta cu e tabata spera di haya un prestamo di USD 650,000, aproximadamente Afl. 1.16 mion, di cual USD 300,000 lo tabata disponibel pa paga acreedornan.

Sinembargo, Corte a considera cu e financiamiento aki lo no tabata suficiente pa cubri e total di e debe pendiente.

CORTE TA RECHASA ARGUMENTONAN FINANCIERO DI UNIVERSIDAD

AUSOMA a cuestiona tambe e suma cu Departamento di Impuesto tabata reclama, argumentando cu su debe real di impuesto tabata considerablemente mas abou.

Sinembargo, Corte a conclui cu e universidad no a presenta prueba suficiente pa sostene e argumentacion aki.

Tampoco tabatin prueba convincente cu tabatin acuerdo di pago cu Departamento di Impuesto of SVB.

Apesar cu AUSOMA a presenta prueba di un pago di USD 5,000 relaciona cu e reclamacion original di USD 30,000 di e partido cu a pidi bancarota, Corte a conclui cu e pago aki no tabata suficiente pa demostra cu e universidad a supera su problemanan financiero mas amplio.

E curado a confirma tambe cu e a ricibi USD 150,000 den su cuenta di tercero pa cubri gastonan operacional di AUSOMA. No obstante, Corte a haya cu no tabatin prueba cu e debe pendiente a wordo paga of cu algun acuerdo cu acreedornan a cambia e situacion financiero di e universidad.

Como consecuencia, Corte a determina cu AUSOMA ainda tabata den un situacion di cesamento di pago.

STUDIANTENAN POR TIN POSIBILIDAD PA SIGUI NAN ESTUDIO

Durante e proceso di apelacion, a presenta preocupacion tocante na e impacto cu e bancarota por tin riba e studiantenan di AUSOMA, specialmente pasobra e problema financiero por obliga nan pa interumpi nan estudio durante e aña academico.

Corte a reconoce e preocupacionnan aki y a indica cu un declaracion di bancarota no ta kita necesariamente tur posibilidad pa sigui actividadnan educativo.

Cu cooperacion di e curado, AUSOMA por sigui explora e posibilidad di un reinicio di actividadnan of un continuacion temporal di su operacionnan.

Esaki ta laga un posibilidad habri pa e actividadnan educativo sigui, aunke e sentencia no ta garantiza cu un solucion di e tipo lo wordo logra.

DECISION DI BANCAROTA TA KEDA NA VIGOR

Corte di Husticia a rechasa e apelacion di AUSOMA y a confirma e decision di bancarota di 9 di october 2026. E proceso di bancarota lo sigui bou supervision di e curado nombra, mr. G.W. Rep.E decision a wordo duna dia 12 di november 2026 pa e hueznan C.G. ter Veer, G.C.C. Lewin y R. Prakke-Nieuwenhuizen.

 Pa AUSOMA, su acreedornan, empleadonan y studiantenan, e atencion awor ta dirigi riba con e proceso di bancarota lo wordo maneha y si tin posibilidad pa un reinicio of continuacion temporal di e institucion.