Decreto ta firma! Carnaval 73 por inicia oficialmente!

ORANJESTAD — Prome Minister Mike Eman, den su calidad di Minister di Cultura, a firma dialuna mainta e decreto ministerial cu ta duna luz berde pa inicio oficial di Carnaval 73, cu su prome actividadnan programa pa e siman aki.

E firma a tuma luga na Bestuurskantoor, den presencia di presidente di Stichting Maneho di Aruba su Carnaval (SMAC), Russette Croes, presidente saliente Darren van Ommeren y consehero di Ministerio di Cultura, Zuleika Wever.

Cu e decreto, Gobierno ta encarga SMAC oficialmente un biaha mas cu coordinacion y organisacion di e temporada carnavalesco, cu ta cuminsa dia 11 di november 2026 y ta continua durante januari y februari 2027.

Gobierno a reafirma su compromiso cu preservacion di Carnaval como un di e tradicionnan cultural mas importante di Aruba. Ademas di su balor cultural, Carnaval ta contribui na actividad economico y promocion turistico di e isla.

Cu e firma di e decreto ministerial, e preparacionnan por pasa oficialmente den fase di ehecucion, habriendo caminda pa un temporada nobo di Carnaval na Aruba.