DEA ta habri inscripcion pa Prueba di Naturalisacion 2027

ORANJESTAD — Departamento di Enseñansa Aruba (DEA) a anuncia cu inscripcion pa Prueba di Naturalisacion 2027 ta habri entrante dialuna 9 di november pa 8’or di mainta te cu diabierna 13 di november pa 4’or di atardi.

Candidatonan por inscribi pa e cuatro pruebanan di Papiamento nivel A2 — Lesa, Scucha, Skirbi y Papia — y tambe pa prueba di OC & OE (Orientacion Comunidad y Orientacion Estatal).

Segun DEA, inscripcion mester wordo hasi exclusivamente online via www.ea.aw of e pagina special di naturalisatietoets. Pa completa e proceso, solicitantenan mester tin un direccion di Gmail; otro tipo di e-mail no lo wordo acepta. DEA a aclara tambe cu no ta acepta inscripcion na balie ni via e-mail.

Tin solamente 80 cupo disponibel pa cada prueba. Ora e cupo ta yena, inscripcion lo sera cera.

Persona cu kier inscribi mester upload varios documento na formato PDF, incluyendo un paspoort valido, un extracto di registro civil di Aruba no mas bieu cu seis luna, y otro certificadonan of diploma, si ta aplicabel.

DEA a informa cu solamente inscripcionnan completo lo wordo procesa. Cada candidato lo ricibi un e-mail di confirmacion despues di entrega di su solicitud.

E pruebanan di Naturalisacion lo tuma lugar entre 27 januari 2027 y 11 februari 2027. Pa mas informacion, DEA ta referi interesadonan na e foyeto informativo riba www.ea.aw y na su paginanan di Facebook y Instagram @educationaruba.