CUA: Gobierno ta haci bida mas caro y pasa e carga pa comercio

ORANJESTAD — Vice presidente di Comerciantenan Uni di Aruba (CUA), Francis Saladin, a acusa Gobierno di contribui na aumento di costo di bida via impuesto y tarifanan mas halto, mientras e ta spera cu comercio absorbe mas gasto. Diamars mainta durante un conferencia di prensa, el a reclama pa un dialogo real riba aumento di salario minimo te na nivel di subsistencia. “Nos tur sa y ta sinti con nos poder di compra a bay atras”, Saladin a declara. Pero el a rechaza cu Gobierno ta pone e culpa riba sector comercial, sin reconoce e impacto di su propio decisionnan.

BBO NA FRONTERA COMO EHEMPEL

Como ehempel, el a menciona BBO na frontera, grondbelasting y tarifa di awa. Segun Saladin, e carganan aki ta afecta tanto negoshinan como consumidor y ta limita e capacidad di comercio pa absorba e aumento adicional. “Cada biaha Gobierno ta aumenta su entrada via impuesto, pero ta pretende cu comercio por carga esaki riba su lomba indefinidamente”, el a expresa.

CRITICA CONTRA EMAN 

Saladin a dirigi su critica tambe na Prome Minister Mike Eman. Segun su version, e decision pa aumenta salario minimo ya tabata tuma, y sector comercial solamente por a indica ki compensacion e ta desea pa mitiga e impacto. El a describi e acercamento como “casi dictatorial”. “Bo por bisa loke bo kier, pero ki cosnan extra bo kier pa mitiga esaki? Esaki no ta dialogo”, Saladin a declara.

AUMENTO DI GASTO DI PERSONAL

El a adverti cu aumento di gasto di personal por obliga negoshinan subi prijs of reduci cantidad di empleado. Segun e, gasto di personal ta e gasto mas grandi pa mayoria di compania, y comercio no tin capacidad ilimita pa sigui carga mas obligacion. CUA kier busca un solucion hunto cu Gobierno, cu ta inclui reduccion di gasto publico, alivio di presion di impuesto y medidanan pa mehora poder di compra. “Nos kier  pa hunto nos ta e solucion duradero y creativo”, Saladin a afirma. El a insisti cu e meta mester ta yuda esnan cu ta perdiendo poder di compra, sin provoca mas desbalance den economia.